ဖဲ ခ.န. ၃၀ တၢ်ယီၤ​ထီၣ်​သီ​န့ၣ် ယ့ၣ်ၡူး​လဲၤဝဲ​လၢ​ဝ့ၢ်​ယရူၤၡလ့ၣ်​အ​ပူၤ​လီၤ. ပှၤ​ဂီၢ်မုၢ်​တဖၣ်​ဟဲဝဲ​လၢ ဝ့ၢ်​အံၤ​ဒ်သိး​က​မၤဝဲ ဘူၣ်လဲၤကပာ်​အဂီၢ်​လီၤ. ဖဲ​ပှၤ​မၤ​မူးပွဲ​အံၤ​အခါ အဝဲသ့ၣ်​ဟဲ​လုၢ်ထီၣ်​ဝဲ ဆၣ်ဖိ​ကီၢ်ဖိ​လၢ တၢ်လုၢ်ဟံၣ်​လီၤ. ပှၤ​တနီၤ​ဟဲ​စိာ်ဝဲ ဆၣ်ဖိ​ကီၢ်ဖိ ဒီး​အဂၤ​တနီၤ​န့ၣ် ပှ့ၤ​ဝဲ​ဆၣ်ဖိ​ကီၢ်ဖိ​လၢ ဝ့ၢ်​ယရူၤၡလ့ၣ်​အ​ပူၤ​လီၤ.

ဖဲ​ယ့ၣ်ၡူး​လဲၤနုာ်​လီၤ​လၢ တၢ်လုၢ်ဟံၣ်​ပူၤ​အခါ​အဝဲ​ထံၣ်ဝဲ ပှၤဆါ​ဆၣ်ဖိ​ကီၢ်ဖိ​တဖၣ်​ဖဲ​န့ၣ်​လီၤ. အဝဲသ့ၣ်​ဆါ​တၢ်​ပှ့ၤတၢ်​လၢ ယဟိဝၤ​ယွၤ အ​တၢ်လုၢ်ဟံၣ်​အ​ပူၤ​လီၤ. ယ့ၣ်ၡူး​မၤဝဲ​ဒ်လဲၣ်. ယ့ၣ်ၡူး​ဟံးန့ၢ်​ဝဲ​ပျံၤ ဒီး​ဟီထီၣ်ကွံာ်​ဝဲ​သိ​ဒီး​ဂီၤဖံး​တဖၣ် လၢ​တၢ်လုၢ်ဟံၣ်​ပူၤ​န့ၣ်​လီၤ. ယ့ၣ်ၡူး​မၤ​လီၤတကျၢၢ်​ကွံာ် ပှၤ​လဲ​စ့​လီၢ်​ဒီး​တၢၤ​လီၤ​ကွံာ် အဝဲသ့ၣ်​အ​စ့​လၢ​ဟီၣ်ခိၣ်​လိၤ​လီၤ. ယ့ၣ်ၡူး​တဲဘၣ်​ပှၤဆါ ထိၣ်လွံၢ်​တဖၣ်​လၢ– ‘စိာ်ထီၣ်​ကွံာ်​သု​တၢ်ဖိ​တၢ်လံၤ​ခဲလၢာ်. ဒုး​ကဲထီၣ်​ယ​ပၢ်​အဟံၣ်​လၢ တၢ်ဆါ​တၢ်ပှ့ၤ​အလီၢ်​တဂ့ၤ.’

ဘၣ်ဃး​ဒီး​တၢ်​လၢ​ယ့ၣ်ၡူး​မၤဝဲ​တဖၣ်​န့ၣ် ပှၤ​ဂီၢ်မုၢ်​တဖၣ်​လၢ အိၣ်​လၢ​တၢ်လုၢ်ဟံၣ်​အ​ပူၤ​န့ၣ် ကမၢ​ကမၣ်​ဝဲ​လီၤ. ယ့ၣ်ၡူး​အပျဲၢ်​အဘီၣ်​တဖၣ် သ့ၣ်နီၣ်ထီၣ်​က့ၤ​ဝံ​အ​တၢ်ကတိၤ​လၢ အ​တဲ​ဘၣ်ဃး​ဒီး မ့းၡံအၤ​လၢ– ‘ယ​သး​က​ဆူၣ်​လၢ ယဟိဝၤ​ယွၤ​အဟံၣ်​အဂီၢ်​လီၤ.’

လၢခံ ဖဲ ခ.န. ၃၃ န့ၣ် ယ့ၣ်ၡူး​မၤ​ကဆှီ​ထီၣ်​က့ၤ တၢ်လုၢ်ဟံၣ်​လၢခံတဘျီ​လီၤ. ပှၤလၢ အ​တ​ပာ်ဖျါ​ထီၣ် တၢ်​ယူးယီၣ်​ပာ်ကဲ​အ​ပါ​အဟံၣ်​န့ၣ် ယ့ၣ်ၡူး​ဟီထီၣ်ကွံာ်​အဝဲသ့ၣ်​လီၤ.