Muna nsungi a masanza ma mvu wa 30 wa tandu kieto, Yesu wayenda kuna Yerusaleme. Wantu ayingi bayiza mu mbanza muna kembelela nkinzi a Nduta. Ayingi muna yau bavana tukau twa bulu muna tempelo. Ankaka batwasa e bulu yau, kansi ankaka muna Yerusaleme basumbila yo.

Vava Yesu kayenda muna tempelo, wamona wantu batekanga e bulu. Bavanganga kinkita muna nzo ya sambidila Yave. Adieyi Yesu kavanga? Wavanga lubamba yo vaikisa awana batekanga ngombe yo mameme muna tempelo. Wakindula e meza ma mimbudi a nzimbu yo mwanga e nzimbu zau vana  ntoto. Yeus wavovesa awana batekanga mayembe vo: ‘Nuvaikisa e lekwa yayi mwamu. Ke nukitudi nzo a Se diame ko se fulu kia vangila kinkita.’

Wantu bakala muna tempelo basivika kikilu mu kuma kia dina Yesu kavanga. Alongoki andi basungamena ungunza wavovelanga Masia oku vo: ‘Izala yo vema mu kuma kia nzo a Yave.’

I bosi, muna mvu wa 33 wa tandu kieto, Yesu wavelelesa e tempelo mu nkumbu anzole. Kayambula konso muntu ko kakondwa e nzo a Se diandi luzitu.