Mvuhˇ goˇ ve awˬ yanˇ Peˍteˍkoˆteˍ 30 hkʼawꞈ C.E. htaˇ, Yeˍsuˆ Yeˍruˆsaˍlehnˍ venˇ lo kʼai ve yoˬ. Oˇ ve teˇ yanˇ Paˍsaˍhkaˍ pawehˇ te tuˬ chaw laˬ maˇ jaˇ. Maˇ˗awˍ ve kʼo, pawehˇ chi ve hkʼaw laˬ ve chaw lehˬ bon yehˬ lonˉ hkʼaw tuˉ tanˇ tuˬ laˬ ve yoˬ. Chaw teˇ hpaˍ kʼo, to nuˇ to shaˆ a shu yawˇ hkʼaˇ yawˇ yuˬ laˬ ve maˇ heˆ leh teˇ hpaˍ kʼo Yeˍruˆsaˍlehnˍ venˇ lo ca vuiˬ la ve yoˬ.

Yeˍsuˆ bon yehˬ lonˉ hkʼaw loꞈ˗e htaˇ, yawˇ Yaˬhoˉvaˬ ve yehˬ hkʼaw tanˇ kaˬ paˍ to nuˇ to shaˆ awˬ hpfuhˇ hawˇ hkʼaˆ jaˇ ve htaꞈ gʼa mawˬ ve yoˬ. Yeˍsuˆ hkʼaˬ hkʼe te ve le? Yawˇ aˉ caˆ hkeh yuˬ leh jawꞈ tuˬ te peuˬ hkʼawꞈ nawˉ, chaw oˇ ve teˇ hpaˍ htaꞈ gʼaꞈ kʼoˬ piˇ ve yoˬ. Oˇ ve lehˬ chaw, nuˇ, yawˬ, leh aˉ pui kʼaˍ teˇ  hpaˍ htaꞈ kaꞈ gʼaꞈ tawˆ piˇ ve yoˬ. Yeˍsuˆ lehˬ hpu pa shehˍ hpaˇ ve hpui lawˇ htaꞈ hpfuhˆ baˬ leh hpu teˇ hpaˍ htaꞈ kaꞈ ngeuˍ baˬ piˇ ve yoˬ. Yeˍsuˆ aˉ pui kʼaˍ hawˇ paˍ htaꞈ kʼoˆ piˇ ve, ‘mawˇ hkʼa peu˗eˬ yuˬ tawˆ˗e, ngaˬ ve Awˬ pa ve yehˬ hkʼaw mawˇ hawˇ kuiˬ maˇ heˆ.’

Bon yehˬ lonˉ hkʼaw chehˇ ve chaw Yeˍsuˆ te ve htaꞈ mawˬ htaˇ anˇ ve yoˬ. Tcuh kaˍ paˍ ve tawˇ hkawˇ Meˍsiˉyaꞈ htaꞈ caˉ daꞈ ve kʼoˆ taˍ ve htaꞈ yawˇ ve awˬ laꞈ gʼawˇ tawnˇ gʼa ve yoˬ. Oˇ kaˬ lo kʼoˆ ve, ‘Yaˬhoˉvaˬ ve bon yehˬ htaꞈ ngaˬ dawˇ law leh aˬ miˍ hkʼa shuˍ ngaˬ awˬ hkʼaw lo toꞈ chehˇ taˍ ve yoˬ.’

Oˇ ve hkʼawꞈ nawˉ Peˍteˍkoˆteˍ 33 hkʼawꞈ C.E. htaˇ, Yeˍsuˆ bon yehˬ lonˉ hkʼaw kʼai leh tanˇ kaˬ paˍ htaꞈ teˇ pawˆ kʼawꞈ gʼaꞈ kʼoˬ piˇ ve yoˬ. Yawˇ ve Awˬ pa ve yehˬ hkʼaw shu htaꞈ maˇ shawˍ maˇ caˆ maˇ te tcuh.