Bʼalo toj xjaw te abril te abʼqʼi 30, xiʼ Jesús toj tnam Jerusalén. Nim xjal otoq cheʼx toj tnam ikʼsalte Xjan Qʼij. Jun tiʼ at toklen tukʼil ikʼsabʼil lu, in xi kyiʼntoq xjal txkup te oyaj toj tja Dios. Ateʼtoq junjun xjal in xi kyiʼn kyalun, atzun junjuntl in tzajtoq kylaqʼoʼn aj kypon toj tnam Jerusalén.

Tej tpon Jesús toj tja Dios, ok tkeʼyin ateʼtoq junjun xjal in che kʼayin txkup atz. ¡In che kʼayintoq xjal toj tja Jehová jatumel in che kʼulin te! ¿Tiʼ bʼant tuʼn Jesús? Kubʼ tbʼinchaʼn jun asyal kyʼjaj ex ajbʼen tuʼn tuʼn kyetz tlajoʼn qe rit, moqa ẍneʼl, ex qe wakẍ ateʼ toj tja Dios. Ax ikx i ex t-xoʼn qe kymes qeju chʼexpul pwaq, ex tkyaqil pwaq kubʼ chitj  twitz txʼotxʼ. Xi tqʼamaʼn Jesús kye qeju in che kʼayin paloma: «Kyiʼmexe qe jlu tzalu, ex miʼn tzʼok kyqʼoʼne tja Nmane te plas».

Bʼiʼx e jaw labʼin qe xjal ateʼ toj tja Dios tej tok kykeʼyin aju bʼant tuʼn Jesús. Tzaj kynaʼn qe t-xnaqʼtzbʼen aju yol kyaj qʼamaʼn tiʼj Mesías: «Kʼokel nqʼoʼne nim toklen tja Jehová».

Tej tbʼet ambʼil, toj abʼqʼi 33 xiʼ Jesús juntl maj saqsal tja Dios. Mintiʼ xi tqʼoʼn ambʼil kye xjal tuʼn tbʼaj kytzʼilsaʼn tja Dios.