Uelis ipan metstli abril, xiuitl 30, Jesús yajki Jerusalén. Miakej maseualmej mosentilijtoyaj pampa mochiuayaya nopa iljuitl Pascua. Ipan nopa iljuitl kimakayayaj Jehová miak tlakajkaualistli ipan teokali. Sekij kinuikayayaj tlapialmej tlen temakaskiaj, uan sekinok kinkouayayaj nopa tlapialmej ne Jerusalén.

Kema Jesús asito ipan teokali, kiitak sekij maseualmej nopaya kinnamakayayaj tlapialmej. ¡Tlanamakayayaj kampa kinamikiyaya san kiueyichiuasej Jehová! ¿Tlake kichijki Jesús? Kichijki se cuarta ika kuetlaxtli uan kinkixtik nopa borregojmej uan uakaxmej. Nojkia kiixkuepki nopa mesas kampa kipixtoyaj inintomij, uan  nochi nopa tomij tepejki. Jesús kiniljuik katli kinnamakayayaj palomas: “¡Xitlakijkixtikaj! ¡Amo xitlanamakakaj ipan ichaj noTata!”.

Maseualmej katli nopaya itstoyaj mosentlachilijkej kema kiitakej tlen Jesús kichijki. Itokilijkauaj kiilnamijkej se tlajtolpanextili tlen moaxitiskia ipan Mesías: “Nijtlepanitas Jehová ichaj ika nochi noyolo”.

Teipa, ipan xiuitl 33, Jesús sampa kinkixtik tlanamakanij ipan teokali. Kinekiyaya nochi ma kitlepanitakaj iTata ichaj.