TAMACHTILIS 76
Jesús tachipaua itech templo
Kemej itech metsti abril xiuit 30, Jesús yajki Jerusalén. Miakej taltikpakneminij no yajkej ompa porin yaya kichiuatij Pascua. Itech nejon iluit, itech templo kitemakayaj tapialmej kemej nemaktilmej. Sekin kinualkuiaj inintapialuan, sayoj ke oksekin kinkouayaj ompa Jerusalén.
Keman Jesús ajsik templo, kinitak seki taltikpakneminij akin ompa kinamakatoyaj tapialmej. ¡Motomintijtoyaj itech kali kampa kiueyichiuayaj Jiova! ¿Toni kichiuak Jesús? Kikuik seki mekat uan ika kinkixtij ichkamej uan kuakuejmej. No kintsonkepak mesas tein kikuiaj akin kipatayaj tomin, uan nochi tomin uetsito
talpan. Jesús kiniluij akin kinamakatoyaj uiltsitsin: “¡Xikijkuanikan nochi nejin! ¡Amo xikchiuakan ichan noTajtsin se tanamakaloyan!”.Akin yetoyaj itech templo kimoujkaitakej tein Jesús kichiuak. Imomachtijkauan kielnamikkej tein moijtojka ke kichiuaskia Mesías: “Semi nikpoujkaitas ichan Jiova”.
Satepan, itech xiuit 33, Jesús ika ojpa tachipauak itech templo. Amo kikauaya maj nion akin amo kipoujkaitani ichan iPopaj.
“Amo uelis nankitekitilijtinemiske Totajtsin Dios uan in ricojyot.” (Lucas 16:13)