MuApilili momumvo 30 E.N., Jesus okwa yile kuJerusalem. Moshilando moka omwa li mu na aantu oyendji ye ya kOpaasa. Oya gandja omayambo giinamwenyo kotempeli, omolwoshituthi shoka. Aantu yamwe oye etelele iinamwenyo yawo, ihe yalwe oye yi landa muJerusalem.

Sho Jesus a yi kotempeli, okwa mono aantu taya landithile mo iinamwenyo yawo. Oya li tayi ikongele iimaliwa mongulu yaJehova yegalikano. Jesus okwa ningi po shike? Okwa ningi ongola yepando nokwa tidha mo oongombe noonzi motempeli. Oku undulile pevi iitaafula yaalandithi nokwa tilehi iimaliwa yawo. Okwa lombwele  aalandithi yoonguti a ti: ‘Kuthii mo iinima mbika ayihe! Ongulu yaTate inamu yi ninga ehala lyokulandithila.’

Aantu mboka ya li motempeli oya li ya kuminwa shoka Jesus a ningi. Aalongwa ye oya dhimbulukwa ehunganeko kombinga yaMesiasa tali ti: ‘Otandi ka kala ndi na uulaadhi, omolwongulu yaJehova.’

Konima yethimbo, momumvo 33 E.N., Jesus okwo opaleke ishewe otempeli oshikando oshitiyali. Ka li e etha nando ogumwe a shekithe ongulu yaHe.