Uvwre ubiamo ọrẹ April uvuẹn ẹgbukpe 30 C.E., Jesu no riẹ i Jerusalem. Ihworho buebun i rhiẹ i Jerusalem ma riorẹ Ọnyavrẹn na. Aye ne ze izobo uvuẹn oghwa ẹga na, nime ọ ha usuẹn irueruo orẹ Ọnyavrẹn na. Ihworho ezẹko i kpare eranmo rẹ aye ina ha ze izobo lele oma, ọrẹn, awọrọ a dẹ uvuẹn i Jerusalem.

Ọke i Jesu o riẹ oghwa ẹga na, nọ mẹrẹn ihworho ra rhẹ eranmo uvuẹn avwaye. Aye a sueyi uvuẹn oghwa ẹga i Jehova! Me yi Jesu o ruru? Jesu nọ ha ufi e ru uphianphian, no le erhuẹn ọrhẹ igegede na nẹ oghwa ẹga na. Ọye nọ mwa imẹdjẹ ihworho re wene igho na se, igho aye ni tue  fughwẹ. Jesu nọ ta rẹn ihworho ra rhẹ ilekuku na: ‘Are i ti ekwakwa enana nẹ aran! Are i vwa ha oghwa ọsẹ mẹ ru ekete ra sueyi-i!’

Oborẹ i Jesu o ruru na no gbe ihworho buebun unu. Idibo yi ni karorhọ aruẹmẹrẹn ro sekpahen i Messiah na, rọ tare: ‘Oruru kpahen oghwa i Jehova ọnọ vuọn mẹ oma.’

Ọke oru, uvuẹn ẹgbukpe 33 C.E., Jesu nọ rharhumu ru oghwa ẹga na fon. Ọye ọ guọlọ nẹ ohworho owuorowu o gbe oghwa ẹga i Jehova ghwu-u.