Jesusqa 30 watachömi abril killamampa Jerusalenman ëwarqan. Y mëtsikaq nunakunam ëwashqa kayarqan Pascua fiestata celebraq. Tsë fiestachömi Diospa templuchö animalkunata ofrendayaq. Wakinkunaqa kikinkunapa animalninkunatam apayaq, peru wakinqa kikin Jerusalenchömi rantiyaq.

Templuman chärirqa, nunakuna animalkunata rantikur këkäyaqtam rikärirqan. Mä. . . ¡Jehoväta adorana wayichömi rantikur kakïkäyänaq! ¿Y imatataq Jesusqa rurarqan? Juk chikutita rurëkurmi üshakunata y wäkakunata templupita qarqurqan. Jina qellë trokaqkunapa mësankunatam tikrakacharkurqan, tsëmi qellëninkunapis limpu  ramakärirqan. Y paluma rantikoqkunatam kënö nirqan: “¡Këpita llapanta jorqayë! ¡Ama Teytäpa wayinta mercäduman tikratsiyëtsu!”.

Templuchö këkaq nunakunaqa espantashqam Jesus ruranqanta rikaräyarqan. Y qateqninkunaqa Diospa Palabranchö Mesïaspaq kënö ninqantam yarpäriyarqan: “Jehoväpa wayintam alläpa respëtuwan rikäshaq”.

Tsëpita juk tiemputam, 33 watachö templuta Jesus yapë limpiarqan. Manam permitirqantsu Teytampa wayinchö pipis munëninta rurakunanta.