Huata 30-pimi Jesusca Jerusalenman rirca. Abril quillami cashcanga. Achca gentecunami pascuata yuyaringapaj chai llajtaman rircacuna. Chaipimi Diospaj huasipi ofrendata cungapaj animalcunata apamurcacuna. Huaquincunaca paicunapaj animalcunatami apamujcuna carca. Shujtajcunaca chai llajtallapitajmi animalcunata randijcuna carca.

Jesús Diospaj huasiman chayamushpaca huaquin gentecuna animalcunata cꞌatucushcatami ricurca. Chai gentecunaca Diosta adorana huasipimi negociocunata ruracurcacuna. Chaita ricushpaca ¿Jesusca imatataj rurarca? Achcata pꞌiñarishpami huascata doblashpa ovejacunata, huagracunata azotishpa  llujshichishpa cacharca. Cullquita cambiajcunapaj mesacunatapish tꞌangashpami tucuita pambaman shitarca. Palomacunata cꞌatujcunatapish Jesusca, ‘¡caicunata caimanta anchuchichij! ¡Ñuca Yayapaj huasitaca cꞌatuna randina ucutaca ama ruraichijchu!’ nircami.

Jesús imata ruracujta ricushpaca gentecunaca achcatami mancharircacuna. Chai ratomi paita catijcunaca Mesiasmanta parlaj profeciapi, ‘Diospaj huasitaca achcatami respetasha’ nishcata yuyarircacuna.

Huata 33-pica cutinmi Diospaj huasita Jesusca pꞌicharca. Paipaj yayapaj huasita tucuicuna respetachunmi munarca.