76 ЛЕКЦИЈА
О Исус палдинѓа е трговцон таро храми
Негде околу април 30 берш а.е., о Исус гело ко Ерусалим. Бут мануша авена сине ки акаја диз те славинен и Пасха. Ко акава празнико ола дена сине животинска жртве ко храми. Несаве анена сине, а несаве кинена сине животне ко Ерусалим.
Кеда о Исус кхувѓа ко храми, дикхља сар о мануша андре бикинена животне. Ола заработинена сине паре ко е Јеховаскоро кхер коте со авена сине о мануша те служинен леске. Адава бут хољанкерѓа е Исусе. Ов керѓа јекх камшико таро шеле хем палдинѓа е бакхрен хем е гурувен таро храми. Превртинѓа о асталија адаленгере со менинена сине
паре хем фрдинѓа лен ки пхув. Адаленге со бикинена сине гулубија о Исус вакерѓа: „Циден адава акатар! О кхер ме Дадескоро нане тхан коте со бикинела пе!“О мануша ко храми сине изненадиме таро адава со керѓа о Исус. Лескере ученикија сетинѓе пе ко јекх пророштво башо Месија: „Бут ка мангав о кхер е Јеховаскоро.“
Покасно, ко 33 берш а.е., о Исус дујто пути палдинѓа е трговцон таро храми. Ов на мукхља о мануша те сикавен кај на поштујнена о кхер лескере Дадескоро.
„Нашти те служинен хем е Девлеске хем е барвалипаске“ (Лука 16:13)