NSOLO 76
Yezu Acenesa Templo
Pidapita miyezi mingasi pidamala Yezu kubatizwa, aenda ku Yerusalemu. Anthu azinji akhadaenda kweneko toera kucita Paskwa. Pa phwando ya Paskwa, anthu akhapereka ntsembe ya pinyama pa templo. Anthu anango akhabweresa pinyama pyawo, mbwenye anango akhapigula mu Yerusalemu.
Pidaenda Yezu mu templo, aona anthu mbakagulisa pinyama mwenemu. Iwo akhali mwenemu tayu toera kulambira Yahova, mbwenye toera kuwina kobiri! Kodi Yezu acitanji? Iye acita ntcamu wa nkhambala mbabulusa mabira na ng’ombe kunja kwa templo. Buluka penepo, iye agwisa meza za anyakucinjisa kobiri mbaponya kobiri yawo pantsi. Yezu apanga anthu akhagulisa nkhangaiwa: ‘Bulusani pyenepi muno! Lekani kucita nyumba ya Babanga kukhala mbuto yamalonda!’
Penepo anthu adzudzumika na pidacita Yezu. Anyakupfundzace akumbuka profesiya inalonga pya Mesiya: ‘Ndinadzafuna kakamwe nyumba ya Yahova.’
Mu caka 33 N.W., Yezu acenesa pontho templo kaciwiri. Iye nee akhafuna kuti munthu apswipise nyumba ya Babace.
‘Munacimwana kukhala nyabasa wa Mulungu na wa Mpfuma.’—Luka 16:13
Panango Munakomerwa Kudziwa Ipi
YEZU—NDI NJIRA, UNDIMOMWENE NA UMASO
Yezu Apangiza Phinga ku Ulambiri Wandimomwene
Mwambo wa Mulungu ukhatawirisa anthu toera kulipa pinyama mu Yerusalemu toera kupereka ntsembe, mphapo thangwi yanji Yezu aipirwa na anyamalonda mu templo?
