Entfwasahlobo ngemnyaka wa-30 C.E., Jesu waya eJerusalema. Bekunebantfu labanyenti eJerusalema lebebatogubha umkhosi weliPhasika. Nabagubha lomkhosi bebanikela ngetilwane ethempelini. Labanye bebeta nato, kantsi labanye bebatitsenga eJerusalema.

Nakefika ethempelini, Jesu watfola bantfu batsengisa tilwane. Bebatitsengisela endlini yaJehova yekukhontela. Wenta njani Jesu? Wenta siswebhu ngetintsambo, wacosha letimvu netinkhomo ethempelini. Waphindze wacitsa imali yebashintji betimali, wawisa nematafula abo. Watsi kulabo lebebatsengisa ematuba:  ‘Susani letintfo lapha! Ningayenti indlu yaBabe ibe yindlu yekutsengiselana!’

Bantfu lebebasethempelini bamangala nababona Jesu enta loko. Bafundzi bakhe bakhumbula siphrofetho lebesibiketelwe ngaMesiya lesitsi: ‘Ngitawudliwa kushisekela indlu yakho.’

Ngemuva kwesikhatsi ngemnyaka wa-33 C.E., Jesu waphindze wacosha bantfu ethempelini. Abefuna bantfu bayihloniphe indlu yaBabe wakhe.