SOMO LA 76
Yesu Analisafisha Hekalu
Katika mwaka wa 30 W.K., Yesu alienda Yerusalemu. Watu wengi walikuwa wameenda jijini humo kusherehekea Pasaka. Sherehe hiyo ilitia ndani kudhabihu wanyama hekaluni. Watu fulani walikuja na wanyama wao, lakini wengine waliwanunua huko Yerusalemu.
Yesu alipoenda hekaluni, aliwaona watu wakiuza wanyama ndani ya hekalu. Walikuwa wakijipatia pesa ndani ya nyumba ya Yehova ya ibada! Yesu alitendaje? Alitengeneza mjeledi wa kamba naye akawafukuza kondoo na ng’ombe kutoka hekaluni. Akapindua meza za watu waliokuwa wakibadili pesa na kumwaga sarafu zao chini. Yesu akawaambia wale waliokuwa wakiuza njiwa: ‘Ondoeni vitu hivi kutoka hapa! Acheni kuifanya nyumba ya Baba yangu kuwa nyumba ya biashara!’
Watu waliokuwa hekaluni walishangazwa na jambo ambalo Yesu alifanya. Wanafunzi wake wakakumbuka unabii huu uliomhusu Masihi: ‘Nitakuwa na bidii nyingi kwa ajili ya nyumba ya Yehova.’
Baadaye, katika mwaka wa 33 W.K., Yesu alisafisha hekalu kwa mara ya pili. Hangemruhusu mtu yeyote aishushie heshima nyumba ya Baba yake.
“Hamwezi kuwa watumwa wa Mungu na wa Mali.”—Luka 16:13
Huenda Ukapenda Pia
YESU—NJIA, KWELI, NA UZIMA
Yesu Ana Bidii kwa Ajili ya Ibada ya Kweli
Sheria ya Mungu ilikubali watu wanunue wanyama huko Yerusalemu kwa ajili ya kutoa dhabihu, basi kwa nini Yesu aliwakasirikia wafanyabiashara hekaluni?
UWE RAFIKI YA YEHOVA
Heshimu Nyumba ya Yehova
Unaweza kuonyeshaje kwamba unaiheshimu nyumba ya Yehova ya ibada?
MAZOEZI YA PICHA
Yesu Asafisha Hekalu
Soma masimulizi ya Biblia na utafute mambo manne ambayo si sahihi katika picha hii.
