PĚNGANGĚNDUNGANG 76
Yesus Němurěsi Bait
Ěndịu su wul᷊ang April taung 30 M, Yesus nakoạ sarang Yerusalem. Lawọ taumata diměnta sene gunang tumol᷊e Paskah. Su Paskah ene, i sire měgělị sasěmbah binatang su bait. Piạ u seng nẹ̌bawa bọu wal᷊e, katewe piạ lai hědo měměli su Yerusalem.
Su tempong Yesus nakoạ sarang bait, sene i sie nakasilo taumata měbẹ̌bal᷊ụ binatang. I sire nědeạ doitẹ̌ su tampạ taumata měngibadah si Yehuwa! I Yesus sěbạe nẹ̌pědu. I sie někoạ cambokẹ̌ bọu tal᷊i, bọu ene něnguserẹ̌ manga domba dingangu sapi bọu bait. I sie něngal᷊intuing manga mědang měnanukarẹ̌ doitẹ̌ dingangu něnal᷊iawuhẹ̌ manga doitẹ̌ logam sarang ěntana. Yesus nẹ̌bera su
manga mẹ̌bawal᷊u burung paluma, ’Bawa kěbị ini! Abe koạ bal᷊eng i Amangku tampạu pẹ̌bawal᷊ụkang!’Taumata su bait sěbạe naherang nakasilo apa seng nikoạ i Yesus. Manga murite apidu nakatahěndung bawerang sěngkatau nabi soal i Mesias, ’Iạ sěbạe makěndagẹ̌ su wal᷊eng i Yehuwa.’
Bọu ene su taung 33 M, i Yesus saụ něnokol᷊ẹ̌ mẹ̌bawal᷊ụ bọu bait. I sie madiri piạ u měhinakang bal᷊eng i Amange.
”I kamene tawe makoạ ělangu Mawu apidu makoạ ělangu Kakakalạ.”—Lukas 16:13