Ken inyom i 30 la, Yesu za ken Yerusalem, sha shighe u urahe. Yange ior kpishi za ken Yerusalem sha u za ember iniongo i Paseka. Ve lu eren iniongo ne nan iniav sha uzendenya ken tempel. Mbagenev va a uzendenya vev, kpa mbagenev yô, lu yamen uzendenya ken tempel.

Yesu karen zan ken tempel yô, a nenge ior lu teen uzendenya ker. Ve lu eren inyaregh ken iyou i civir Yehova je! Nahan Yesu er nena? Yesu hide tôô ikyor tume akpa a mi, a zenda iyôngo man ivo man ibua ken tempel kera. A daa utebul mba i lu musan inyaregh sha mi la ve gba, nahan inyaregh tsenda hen inya. Yesu kaa a mba ve lu teen mkungum la ér: ‘Due nen a  akaa ne heen kera! De geman nen iyou i Terem i hingir ijiir i eren kasua ga!’

Kwagh u Yesu er ne kpiligh ior mba ve lu ken tempel la iyol. Mbahenen nav maa umbur kwaghôron u profeti ugen sha kwagh u Mesiya. Kwaghôron u profeti la kaa ér: ‘Kwagh u iyou i Yehova una gbam ishima tsung.’

Shighe karen yô, Yesu shi za wanger tempel sha kwa har. Kwa ne lu ken inyom i 33 la. Yesu yange lumun ér or môm kpa nana er a iyou i Ter na dang ga.