Kwalomo ka hweti ya Abril, hi lembe ga 33 Nguveni ya Hina, Jesu i noya Jerusalema. Ku wa hi ni vanhu vo tala va nga tile laha dhoropeni legi kasi va taga Pasika. Ka festa leyo, va wa maha minyikelo hi zvifuyo lomu tempeleni. A vokari va wata ni zvifuyo zvabye. Kanilezvi, a van’wani va wa xava kwalomu Jerusalema.

A cikhati leci Jesu a ngaya lomu tempeleni, i no wona vanhu na va kari va xavisa zvifuyo. Va wo ti xavisela zvilo zvabye kwalomu ndlwini leyi Jehovha a nga khozelwa ka yona! Lezvo zvi mu swirile nguvhu Jesu. I no swula cisepho hi tingoti a hlongola tiyivhu ni tihomu lomu tempeleni, a tlhela a nikinya  timeza ta lava va nga cica mali — a mali yabye yi wetetela lahasi, yi hangalakela. Jesu i no hlongola lava va nga kari va xavisa, aku: ‘Susani zvontlhe lezvi laha! Mu nga teki a yindlu ya Papayi wa mina mu yi maha wutshamu ga ku xavisela kona’!

Lava va nga hi lomu tempeleni va no hlamala nguvhu hi lezvi Jesu a nga maha. A vapizani vakwe va no alakanya ciphrofeto ci wulawulako hi Mesiya, caku: ‘Ndzi ta hisekela yindlu ya Jehovha’.

Loku ku hundzile cikhati, kwalomu ka lembe ga 33 Nguveni ya Hina, Jesu i no basisa tempeli hi khati ga wumbiri. I wa nga vhumeli ku tsika vanhu va nga kombisi cichavo hi yindlu ya Papayi wakwe.