Бистиң эраның чазын 30 чылда Иисус Иерусалимге чедип келген. Хосталыышкын байырлалы болгаш, хоорайда кижилер дыка хөй болган. Улус ол үеде өргүлге бээр мал-маганын боттары эккеп турган, а чамдыктары садып ап турган.

Иисус байырлалга келгеш, мал-маганны өргээниң бодунда садып турарын көрүп каан. Чазый-чилби садыгжылар Иегованың бажыңынга акша ажылдап ап турган! Иисус канчаар алдынган? Ол хендирлерден кымчы кылгаш, хамык хойларны, бугаларны үндүр ойладыпкан. Акша орнап турган улустуң столдарын аңдара октаптарга, акшалары тарадыр чаштай берген. А көге-буга садып  турган улуска Иисус: «Ооңарны моон ырадыңар! Мээң Адамның өргээзи садыг-наймаа чери эвес-тир!» — деп чугаалаан.

Өргээге турган улус Иисустуң канчаар алдынганын көргеш, кайгап калган. А ооң өөреникчилери Мессияның дугайында: «Иегованың бажыңынга дендии күштүг ынакшылдыг боор мен» дээн өттүр билген медеглелди сактып келгеннер.

Үш чыл эрткенде, Иисус база катап өргээни арыглаан. Адазының бажыңынга хүндүткел чок хамаарылга көргүзерин ол кымга-даа чөпшээревээн.