Elimwe ya eyaakha 30 EC, Yesu aahirowa oYerusalemu. Atthu anceene yaahirwa epooma ele omwiira Paasikha. Efesta eyo yaahela muhina ovaha mikuttho sa axinama mutemplo. Atthu akina yaaniruuha inama saya, masi akina yaathuma oYerusalemu.

Vaavo Yesu aakenle awe mutemplo, aahaaweha atthu etumihaka inama. Awo yaamwiira nakoso mpaani mookokhorela mwa Yehova! Yesu oonenle sai? Owo aahipaka murepettho wa mukhoi ni aahoomolela ota ipwittipwitthi ni inama sotheene. Aahipittula meesa a atthu yaaturuka musurukhu ni aahimwarexela vathi musurukhu aya. Yesu  aahaaleela atthu yaatumiha ipomba wira: ‘Mwaakuveke okumiha itthu iya-mu! Empa ya Atithi aka muhikhalihe empa ya nakoso!’

Atthu yaari mutemplo yaahitikinihiwa vanceene ni ele Yesu aapanke awe. Awiixutti awe yaahuupuwela eprofesia yaamulavula Mesiya, yeeyo yaahimya so: ‘Kinimwaakiherya mooluttuweliwa empa ya Yehova’.

Eyaakha ya 33 EC, Yesu aahireeriha-tho etemplo ekwaha ya nenli. Owo aaphavela wira atthu otheene ettittimiheke empa ya Tiithi awe.