Ni oti na soqo ni Lakosivia, e lesu tale i Kalili o Jisu kei ratou na tisaipeli ni ratou muri e Samaria. Ni ratou volekata yani na koro o Saika, e cegu vakalailai o Jisu ena vanua e vakatokai me toevu i Jekope. E vakacegu toka o Jisu ni ratou lai voli kakana ena koro na tisaipeli.

E lai taki wai ena toevu e dua na yalewa. E kaya vua o Jisu: “Rawa ni dua na mequ?” E kaya na yalewa: ‘Cava o vosa kina vei au? O yau na yalewa ni Samaria. Eda sega ni dau veivosaki na Jiu kei na kai Samaria.’ E kaya vua o Jisu: ‘Ke o kilai au, o na kerea me dua na memu wai, meu qai solia vei iko na wai ni bula.’ E taroga na yalewa: ‘Na cava o tukuna tiko? E sega tu mada ga na nomuni vokete.’ E kaya o Jisu: ‘O koya e gunuva na wai au solia ena sega ni karamaca tale.’ E kaya na yalewa: “Ni solia mai na wai qori.”

E qai kaya vua o Jisu: ‘Lai kauti watimu mai.’ E kaya na yalewa: ‘Au sega ni vakawati.’ E tukuna o Jisu: ‘O dina. O sa vakawati oti vakalima, na tagane drau tiko vata qo e sega ni watimu.’ E kaya na yalewa: ‘Au sa qai kila ni oni parofita. Era vakabauta na kainoqu ni dodonu me keimami qarava na Kalou ena ulunivanua qo, ia era kaya na Jiu ni dodonu me keimami sokalou ga e Jerusalemi. Ni sa na lako mai na Mesaia, au vakabauta ni na qai vakavulici keimami ena ivakarau ni sokalou me keimami muria.’ E tukuna sara vua o  Jisu: ‘O yau ga na Mesaia.’ Se qai vakadua me tukuna qori vua e dua tale.

E lako totolo sara ina koro na yalewa qai tukuna vei ira na kai Samaria: ‘Au sa kunea na Mesaia. E kila na ka kece me baleti au. Meda lai raici koya!’ Era muri koya ina toevu qai vakavulici ira o Jisu.

Era kerei Jisu na kai Samaria me lai tiko ena nodra koro. E vakavulici ira tiko me rua na siga ra qai vakabauti koya e levu. Era qai tukuna na lewenikoro vua na yalewa ni Samaria: ‘Neimami vakarogoci koya keimami kila ni o koya ga na ivakabula kei vuravura.’