Maʼaka jeʼra kaʼi süchikijee tü Pascuakat, aleʼejüshi Jesuu namaa na nikirajüinkana Galileamüin. Nantaka Samariamüin jee nojuntaka suluʼumüin wanee mma pejesü sünain tü pueulokot Sicar. Neemeraaka süʼütpaʼa wanee ishi nüsüle Jacob münüsü. Makataka Jesuu yala otta noʼunaka na nikirajüinkana sünain ayaʼlajaa eküülü pueulopaʼamüin.

Süntaka wanee jiet sünain ajaʼitaa wüin. «Püsira maa taya wüin», nümaka Jesuu sümüin. «¿Jamüshi paashajaaka tamüin sümaa wayuuin samariajeʼewat taya? Nnojoishii anajiraain na judíokana namaa na samariajeʼewaliikana», sümaka. «Müleka pütüjaale saaʼu jaralin taya, puchuntüinje tamüin asaire wüin. Jee tasirüinje pia tü wüin katakalü atuma soʼu wayuu», nümaka Jesuu sümüin. Süsakiraka nia tü jietkat: «¿Jamaluʼut pünüiki? ¿Jalasü iita pajaʼitajatka aka tü wüinkat tamüin?». Nusoutaka Jesuu: «Chi eekai nüseechin tü wüin taapakat, müichia nnojolin miyaasüin nüchikuaʼa». Sümaka tü wayuukot nümüin: «Senyotkalee, tasa maa türa wüin paashajaakalü achiki».

«Püma nümüin chi puʼwayuusekai nüntaiwa», nümaka Jesuu sümüin. «Maʼwayuusesat taya», müsü shia. «Lotusü tü pümakat tamüin sünain maʼwayuusein pia. Jaʼraituairü maʼin pia ooʼulaain puʼwayuuse. Jee chi pümaakai maaʼulu yaa, nnojoishi puʼwayuusein», nümaka Jesuu. Susoutaka nümüin: «Eekajaʼa eere pia saaʼin tamüin nünüikimaajachi Maleiwa. Na watuushinuu Samariajanakana, naʼwaajüin Maleiwa yaa saaʼu tü uuchikat. Akaajasaʼa jaajüin jiakana judíokana, chainjachi aʼwaajünüin Maleiwa Jerusalén. Tatüjaa aaʼuchi nieechin chi Mesíaskai ekirajaka waya jamüinjatüin wakuwaʼipa sünain aʼwaajaa Maleiwa». Nüküjaka Jesuu sümüin tü wayuukot wanee kasa nnojoyütkalia nüküjain sümüin wayuu. «Taya chi Mesíaskai», nümaka sümüin.

 Oʼunamaatüsü tia jietkat pueulopaʼamüin. «Tantüichipa anain chi Mesíaskai. Nüküjain süpüshuaʼa tü taaʼinrapuʼukat. Jooʼuya tamaiwa jia otta jiʼraiwa nia», sümaka namüin na chajanakana Samaria. Noʼunaka sümaa eemüin tü ishikat süpüla naapajüin nünüiki Jesuu.

Shiasaʼa joo mapa aʼalijinnüshi Jesuu natuma. Makataka Jesuu namaa soʼu piama kaʼi otta nikirajaka naya sünain wainma kasa. Watta naalii na anoujakana nünain Jesuu. «Sutuma waapajüitpain nünüiki chi wayuukai, wayaawatüitpa aaʼu sünain shiimüin niain chi oʼttaainjachikai atuma wayuu süpüshuaʼa», namaka sümüin tü wayuukot.