Thutha wa Pasaka, Jesu na arutwo ake nĩ maacokire Galili matuĩkanĩirie Samaria. Jesu nĩ aahurũkire handũ heetagwo gĩthima kĩa Jakubu hakuhĩ na itũũra rĩa Sukaru. Rĩrĩa aahurũkĩte hau, arutwo ake nĩ maathiire kũgũra irio itũũra-inĩ rĩu.

Mũtumia ũmwe nĩ aathiire gũtaha maĩ hau gĩthima-inĩ. Jesu aamwĩrire ũũ: “He maĩ nyue.” Nake akĩmwĩra ũũ: ‘Ũranjarĩria nĩkĩ? Ndĩ Mũsamaria. Na Ayahudi matiaragia na Asamaria.’ Jesu akĩmwĩra ũũ: ‘Korũo nĩ ũramenya nĩ niĩ ũ, nĩ ũngĩahoya maĩ na niĩ ngũhe maĩ ma muoyo.’ Mũtumia ũcio akĩmũũria ũũ: ‘Ũrenda kuuga atĩa? Ũtakĩrĩ nginya na ndoo.’ Jesu akĩmwĩra: ‘Mũndũ wothe ũnyuaga maĩ marĩa heanaga ndakaanyota rĩngĩ.’ Nake akĩmwĩra ũũ: “Mũthuri ũyũ, he maĩ macio.”

Jesu aacokire akĩmwĩra ũũ: ‘Thiĩ ũke na mũthuri waku.’ Nake akĩmwĩra: ‘Ndikoragwo na mũthuri.’ Jesu akĩmwĩra: ‘Hau nĩ waria ma. Ũkoretwo ũhikĩte maita matano, na ũrĩa mũrĩ nake rĩu ti mũthuri waku.’ Mũtumia ũcio akĩmwĩra ũũ: ‘Nĩ ndona wĩ mũnabii. Andũ aitũ metĩkĩtie atĩ no tũhoere Ngai kĩrĩma-inĩ gĩkĩ, no Ayahudi metĩkĩtie atĩ no tũhoire tũrĩ Jerusalemu tu. Njĩtĩkĩtie atĩ rĩrĩa Mesia agooka, nĩ agatũruta ũrĩa twagĩrĩrũo kũhoya.’ Jesu aacokire akĩmwĩra ũndũ ateerĩte mũndũ ũngĩ: ‘Niĩ nĩ niĩ Mesia.’

Mũtumia ũcio aateng’erire nginya itũũra-inĩ rĩao na akĩra  Asamaria ũũ: ‘Ngwĩciria nĩ ndona Mesia. Anjĩra maũndũ makwa mothe. Ũkai mũmuone!’ Maathiire nake nginya gĩthima-inĩ na magĩthikĩrĩria Jesu akĩrutana.

Asamaria nĩ maanyitire Jesu ũgeni aikarange itũũra-inĩ rĩao. Aarutanire kuo kwa ihinda rĩa thikũ igĩrĩ na andũ aingĩ makĩmwĩtĩkia. Andũ acio meerire mũtumia Mũsamaria ũũ: ‘Thutha wa gũthikĩrĩria mũndũ ũyũ, rĩu nĩ twamenya atĩ nĩwe mũhonokia wa kĩrĩndĩ.’