Bang’ ka kinde moko ne osekalo nyaka ne tim Pasaka, Yesu gi jopuonjrene ne okalo Samaria ka gichomo Galili. Ka ne gichiegni gi taon mar Sika, Yesu ne obet e dho soko mar Jakobo mondo oyue matin sama jopuonjrene ne odonjo ng’iewo chiemo e taondno.

Dhako moro nobiro twomo pi e sokono. Yesu nokwaye kama: ‘Konyae gi pi amodhi.’ Nodwoko kama: ‘Ang’o momiyo iwuoyo koda to ing’eyo maber ni an Nya-Samaria? Jo-Yahudi ok wuoga gi Jo-Samaria, koso ikia?’ Yesu nodwoke ni: ‘Mad ing’eyee ni an ng’a! Dikoro isekwaya mondo amiyi pi ma kelo ngima.’ Dhakono nowachone niya: ‘Ang’o mitemo wacho? Ka koro kata ndoo e ma iongego, pigno to idwaro golo kure?’ To Yesu nodwoke ni: ‘Ng’ato ang’ata ma omodho pi ma amiye, ng’atno ok nobed gi riyo kendo.’ Dhakono nowachone ni: ‘Miya ane pigno.’

Yesu ne onyise ni: ‘Dhi iluong ane chwori.’ Nodwoko kama: ‘Aonge gi dichwo.’ Yesu nokone ni: ‘Kanyo to iwacho adier. Osekendi dibich, kendo dichwo midakgo sani ok en chwori, donge?’ Dhakono nodwoke ni: ‘Nenore ni in janabi. Jo-Samaria nigi yie ni wi godni e monego walamie Nyasaye, to un Jo-Yahudi uwacho ni wanyalo mana lamo Nyasaye Jerusalem. An gadier ni chieng’ ma Mesia nobi, enopuonjwa yo mowinjore walamgo Nyasaye.’ Yesu nonyiso dhakono wach ma pok nonyisoga ng’ato ang’ata achiel kachiel ni: ‘An e Mesia.’

 Dhakono ne odok e taondgi mapiyo, mi onyiso Jo-Samaria kama: ‘Aromo gi ng’at moro ma nyaka bed ni e Mesia. Ong’eyo wechena te. Biuru unenee!’ Ji ne oluwe nyaka e soko, kendo ne gichiko itgi ne gik ma Yesu ne puonjo.

Jo-Samaria ne okwayo Yesu mondo odonj e taondgi. Yesu ne opuonjo ji e taondno kuom ndalo ariyo, kendo thothgi ne oketo yie kuome. Ji ne onyiso Nya-Samaria kama: ‘Weche mwawinjo ka ng’atni wacho, nyiso gadier ni en jawar.’