Me no aefa Wasa, mangawuli Yesu ba Galilaia hegöi ira nifahaʼönia latörö Zamaria. Ba mbanua sahatö ba Zikhara, molombase Yesu ba mbaʼa nidanö Yakobo, ba möi mowöli gö miyomo ba mbanua sebua ndra nifahaʼönia.

Lö ara, tohare ndra alawe sanaʼu idanö ba mbaʼa daʼö. Imane Yesu, ”Hadia tola uʼandrö khöu nidanö?” Imane ira alawe andrö, ’Hana wa fahuhuoʼö khögu? Yaʼodo niha Zamaria. Lö fahuhuo niha Yahudi ba niha Zamaria.’ Imane Yesu, ’Na öʼila haniha ndraʼo, hasambalö öʼandrö khögu nidanö, ba ubeʼe khöu nidanö sameʼe faʼauri.’ Manofu ndra alawe daʼö, ’Makasumö? Lö hadöi khöu fanaʼu nidanö.’ Imane Yesu, ’Niha samadu idanö nibeʼegu, lö saʼae owökhi dödönia.’ Imane ira alawe daʼö, ”He Pa, beʼe khögu nidanö daʼö.”

Imane Yesu, ’Waʼö khö woʼomou enaʼö möi ia ba daʼa.’ Imane, ’Lö hadöi foʼomogu.’ Imane Yesu, ’Atulö. No lima kali mangowaluʼö, ba tenga foʼomomö ndra matua si toröiʼö iadaʼa.’ Imane ira alawe daʼö, ’Te samaʼeleʼö ndraʼugö andre Pa. Faduhu dödö niha Zamaria wa tola lafosumange Lowalangi ba hili daʼa, hizaʼi lawaʼö ira niha Yahudi ha ba Yeruzalema mufosumange Lowalangi. Faduhu dödögu na tohare Mesia, ifahaʼö ndraʼaga hewisa wamosumange Lowalangi.’ Imane Yesu, ’Yaʼodo Mesia.’ Lö irai ifatunö zimane daʼö Yesu ba niha böʼö.

 Möi ndra alawe daʼö ba mbanua sebua ba wamatunö ba niha Zamaria, ’Hulö no falukhado Mesia. Iʼila fefu zanandrösa khögu. Aine möi ita tafaigi!’ Laʼoʼö ia ba mbaʼa nidanö andrö ba lafondrondrongo wamahaʼö Yesu.

Laʼandrö khö Yesu enaʼö möi ia ba mbanuara. Mamahaʼö ia ba daʼö dua hari, ba ato zi faduhu tödö khönia. Lamane khö ndra alawe Zamaria andrö, ’Me no mafondrondrongo ndra matua daʼö, faduhu dödöma wa yaʼia zangorifi niha gulidanö andre.’