Pascuata yuyarishca qꞌuipaca Jesuspish paita catijcunapish Galileamanmi tigramucurcacuna. Samariapi caj Sicar pueblo cꞌuchullata pasacushpaca Jacobpaj pugyu ladopimi shayarircacuna. Jesús samaringacamaca paita catijcunaca micunata randinamanmi rircacuna.

Chai pugyumanca Samariamanta caj huarmimi yacuta llujshichinaman shamurca. Paitami Jesusca, ‘yacuta cuhuai’ nirca. Chaimi huarmica, ‘¿ima nishpataj ñucahuan parlanguiyari? Judiocunaca Samaria gentecunahuanca mana apanacunchu’ nirca. Jesusca, ‘ñuca pi cashcata yachashpaca, canmari yacuta cuhuai ninguiman. Ñucaca causaita cuj yacutami cusha’ nircami. Huarmica, ‘yacuta imahuan llujshichinatapish mana charinguica’ nijpimi, Jesusca, ‘ñuca cushca yacuta ubyajca, manataj yacunachingachu’ nirca. Chaimi huarmica, ‘shinashpaca chai yacuta ñucaman cuhuai’ nirca.

Qꞌuipaca Jesusca, ‘cambaj cusata cayamugri’ nircami. Paica, ‘mana cusayuj canica’ nirca. Chashna nijpimi Jesusca, ‘canca pichca cusatami charishcangui. Cunan canhuan causacujca mana cambaj cusachu. Mana llullashcanguichu’ nirca. Cutin chai huarmica, ‘canca profetami yuyachingui. Ñuca pueblopi causajcunaca cai urcupimi Diosta adorana can nincunami. Pero judiocunaca Jerusalenllapimi Diosta adorana canchij ninguichijmi. Mesías shamushpami ima shina cashcata alli huillanga’ nircami. Chaimi piman mana huillashcata Jesusca, ‘ñucami Mesías cani’ nirca.

Chashna nijpimi chai huarmica paipaj llajtaman callpashpa rirca. Chayashpaca gentecunataca,  ‘jacuchij, cunanca Mesías pi cashcata ñamari yachani. Paica tucui ñuca causaitami yachan’ nirca. Chaimi paicunaca Jesús yachachishcacunata uyanaman rircacuna.

Samariapi causajcunaca ñucanchijhuan saquiripai nijpimi, Jesusca ishqui punllata yachachishpa chaipi saquirirca. Chaimantami achcacuna Jesuspi crircacuna. Paicunaca samaritana huarmitaca, ‘cai runata uyashpaca pai cai pachata quishpichij cashcatami cunantajca ña yachanchij’ nircacunami.