После кода, сар прожыля и патради о Иисусо и лэстирэ ученикоря жылэ палпалэ андэ Галилея. Вонэ жанас через и Самария и терделэ тэ отцыён паша хаинг, сави варикала стердя о Иаково, паша форо Сихарё. О Иисусо ашэляпэ паша хаинг, ай лэстирэ ученикоря жылэ андо форо тэ тинэн тэ хан.

Ек манушни авеля каринг и хаинг пала паи. О Иисусо мангля латар: «Дэ манди тэ пав паи». Вой ԥэндя: «Васо ту задян дума манца? Мэ же анда Самария. Ай иудеёря на дэн дума лэ самаритянонэнца». О Иисусо ԥэндя лати: «Тэ ӷанглоп ту, ко мэ, тоди екжэни манглоп мандар тэ пэс и мэ диноп тути паи, саво дэл и жизня». Вой пушля лэстар: «Со ту кадэлэса камэс тэ ԥэнэс? Тутэ даже вадра нинай». О Иисусо ԥэндя: «Кажно, ко пэл о паи, саво мэ лэсти дав, будэр на камэла тэ пэл паи». Тоди и манушни мангля: «Ӷосподино, дэ манди кадэва паи».

Тоди о Иисусо ԥэндя лати: «Ақар кардэ пэстирэ хулас». И манушни ԥэндя: «Мандэ нинай хулай». О Иисусо ԥэндя: «Ту на хохавэс. Ту панч разоря санас миростэ, ай о мануш, савэса ту жувэс акана, тути най хулай». Кода, со во ԥэндя, ла манушня ля лэ одестар и тоди вой ԥэндя: «Мэ диқав, кай ту пророко. И мануша анда мэрно народо патян, кай лэ Дэвлэсти трэбуй тэ телён пэ кадэва плай, ай иудеёря ԥэнэн, кай тэ тэлён трэбуй андо Иерусалимо. Мэ патяв, кай кала авэла о Христос, во сытярэла амэн, сар трэбуй тэ тэлювас лэ Дэвлэсти». Тоди о Иисусо ԥэндя  лати кода, со никасти инке никала на ԥэндя: «Мэ о Христос».

И манушни прастая андо форо и ԥэндя лэ манушэнди: «Манди здэлпэ, мэ виарақлэм лэ Христос. Во вся пала мандэ ӷанэн. Жан и екжэнэ диқэн!» Вонэ жылэ ласа каринг и хаинг и линэ тэ ашунэн лэ Иисусос.

И самаритяноря манглэ, кай о Иисусо тэ ашэлпэ андэ лэнго форо. Дуй дес во сытярэлас лэн, и бут мануша патяе андэр лэстэ. Вонэ ԥэндэ кадэла манушняти: «Акана амэ ӷанас, кай во па чачимастэ кодэва, ко спасыя о миро».