Nandeha mba Samaria mbeo ty Jesosy naho i mpiana’e rey naho fa niheregne a Galilia agne, tafara i Pasakey. Naho fa narine ty tanà i Sykara iareo, le nitofa tamy ty toeragne raike atao tihoe vovogne fantsaka i Jakoba ty Jesosy. Fa i mpiana’e rey nimban-tanàgne mbeo, mba hivily hanegne.

Nisy ampela niavy mba hantsaka rano tamy izay. Hoe ty Jesosy tama’e: ‘Meo rano raho hinomeko.’ Le hoe reke: ‘Ino irehafa’o amakò, izaho Samaritana? Ty Jiosy tsy mirehake amo o Samaritanao.’ Hoe ty Jesosy: ‘Naho nifanta’o tie ia raho, le ihe ty hangatake rano amako sady homeiko rano velogne.’ ‘Ino ty tea’o horehafegne?’ hoe i ampelay, ‘ihe tsy managne fitarihan-drano.’ Hoe ty Jesosy: ‘Ze minogne ty rano omeiko aze, le tsy haran-drano sasa.’ Le hoe i ampelay: ‘Omeo amy ze rano zay raho.’

Hoe ty Jesosy tama’e: ‘Ento atoy ty vali’o.’ Le hoe reke: ‘Tsy manambaly raho.’ Hoe ty Jesosy: ‘Maregne zay, fa toe indime nanambaly rehe sady mbe tsy vali’o ka i lahilahy miharo toboke ama’o amy izaoy.’ Hoe i ampelay: ‘Fantako zao fa mpaminany rehe. Izahay mino fa am-bohitse etoagne ty toko’e hivavahagne aman’Andrianagnahare, faie ty Jiosy mirehake tie a Jerosalema agne avao ty toko’e hivavahagne ama’e. Mino raho fa naho fa avy ty Mesia, le hampianatse antika hivavake reke.’ Le hoe ty Jesosy: ‘Izaho o Mesiao.’ Mbe tsy nirehake izay tama o ndaty hafa ty Jesosy.

 Nilay mban-tanà’e mbeo tsiela i ampelay sady nitalily tamo o Samaritanao tie: ‘Nitreako ty Mesia. Fanta’e iaby ty miomba ahy. Andao hagnente aze!’ Nagnorike aze am-bovogne mbeo iareo, hitsanogne ty fampianara i Jesosy.

Nangatahe iareo hijanogne an-tanàgne ao ty Jesosy. Nampianatse tao roe andro reke, le maro ty nanjare nino aze. Hoe iareo tamy i ampelay: ‘Naho fa nitsanogne aze zahay, le fanta’ay tie ie vata’e ty hagnavotse ty tontolo toy.’