L’ɔkɔngɔ wa fɛtɛ k’Elekanelo, Yeso nde la ambeki ande wakatenyanya Samariya dia nkalola la Ngalileya. Suke la osomba wa Sukara, Yeso akomuya lo dihole diakawelɛka ɛtɛkɔ ka Jakɔbɔ. Lam’akandomuyaka lawɔ, ambeki ande wakatshu l’osomba dia tosomba mbo ya ndɛ.

Womoto ɔmɔtshi akaye l’ɛtɛkɔ dia ndjotahola ashi. Yeso akawotɛ ate: “Ombisha yema y’ashi wa nnɔ.” Womoto akɔ akawotɛ ate: ‘Lande na katɛkɛtayɛ la mi? Dimi lekɔ womoto l’ose Samariya. Ase Juda hawɔtɛkɛtshanya l’ase Samariya.’ Yeso akawotɛ ate: ‘Otoyeya eemi, wɛ kotohomba nɔmbami ashi wa nnɔ ndo lotokosha ashi wa lɔsɛnɔ.’ Womoto akɔ akawombola ate: ‘Alangayɛ mbuta? Wɛ bu kaanga l’ɛngɔ ka ntahola ashi.’ Yeso akawotɛ ate: ‘Onto tshɛ lanɔ ashi washami hatoka mposa k’ashi nto pondjo.’ Womoto akɔ akawotɛ ate: “Yɔnɛ, ombisha ashi asɔ.”

Ko Yeso akawotɛ ate: ‘Tshɔka kele toye l’omɛyɛ lo ɛtɛkɔ.’ Womoto akɔ akate ate: ‘Dimi bu la omi.’ Yeso akate ate: ‘Wɛ ambota mɛtɛ. Wɛ ambotshukama mbala tshanu ndo pami kodjashi la yɛ kakianɛ bu omɛyɛ.’ Womoto akɔ akate ate: ‘Lambɛna dia wɛ ekɔ omvutshi. Anto ami mbetawɔka dia sho koka la ntɛmɔla Nzambi lo dikona nɛ, koko ase Juda mbutaka dia sho kokaka ntɛmɔla paka la Jɛrusalɛma. Dimi mbetawɔka dia lam’ayoya Mɛsiya, nde ayoyotetsha woho wa ntɛmɔla.’ Ko Yeso akate dui dimɔtshi diende atatɛka onto okina ate: ‘Dimi mbele Mɛsiya.’

 Womoto akalawɔ otsha l’osomba awɔ ndo akatotɛ ase Samariya ate: ‘Lambɛna Mɛsiya. Nde mbeyaka dui tshɛ diendana la mi. Nyoye nyoyende!’ Vɔ wakoyele lo ɛtɛkɔ k’ashi ndo wakahokamɛ wetshelo wa Yeso.

Ase Samariya wakalɔmbɛ Yeso dia nde ntshikala l’osomba awɔ. L’edja ka nshi hiende, nde aketshaka lɛkɔ ndo anto efula waki la mbetawɔ le nde. Vɔ wakatɛ womoto l’ose Samariya ɔnɛ: ‘L’ɔkɔngɔ wa sho mpokamɛ pami kɛnɛ, tambeya mɛtɛ dia nde ekɔ oshimbedi w’andja ɔnɛ.’