Akxni xtitaxtunita Pascua, Jesús chu kstalaninanin taspitkgolh kʼGalilea. Akxni xʼamakgolh, titaxtukgolh kSamaria chu tachokgokgolh lakatsu kkachikin Sicar, anta kxpozo Jacob. Jesús anta xjaxma chu kstalaninanin xʼankgonit tamawakgo taway kkachikin.

Chatum puskat milh makutu chuchut kpozo, chu Jesús wanilh: “Kakimakgotni”. Xla kgalhskilh: “Akit samaritana, ¿tuku xlakata kintachuwinampat? Judíos ni katachuwinankgo samaritanos”. Jesús wanilh: “Komo xkatsi tiku akit, xkiwani pi xakmakgotnin chu akit xakmaxkin chuchut xla latamat”. Puskat kgalhskilh: “¿Tuku wamputuna? Nitu kgalhiya tuku nalimakutuya chuchut”. Jesús kgalhtilh: “Tiku nalikgotnan chuchut nema akit nakmaxki nikxni katikgalhputipa”. Puskat wa: “Kakimaxki uma chuchut malana”.

Alistalh Jesús wanilh: “Kawani minchixku pi kamilh”. Xla kgalhtilh: “Ni kkgalhi kinchixku”. Jesús wanilh: “Xlikana, xlakata makgkitsis tamakgaxtokgnitata chu uku tawila chatum chixku, pero ni tamakgaxtokga”. Puskat kgalhtinalh: “Kakxilha pi wix palakachuwina. Kinkachikin lakpuwan pi tlan nakakninaniyaw Dios kʼuma sipi, pero judíos wankgo pi xlitakakninanit Dios kJerusalén. Klakpuwan pi akxni namin Mesías, wa nakinkamasiyaniyan la kilikakninanitkan Dios”. Wa xlakata Jesús wa tuku niti xwaninit: “Akit Mesías”.

Puskat lakapala alh xkachikin chu kawanilh samaritanos:  “Ktekgsnit Mesías. Putum katsi xlakata kilatamat. Katantit chu kaʼakxilhtit”. Taʼankgolh kpozo xlakata xkgaxmatnikgolh xtamasiy Jesús.

Wa xlakata, samaritanos skinikgolh Jesús pi anta xtamakgxtakgli. Akgtiy kilhtamaku tamakgxtakgli kkachikin chu lhuwa tuku kamasiyanilh chu lhuwa tiku kanajlanikgolh. Alistalh wanikgolh samaritana: “Xlakata kkgaxmatninitaw uma chixku, la uku kkatsiyaw pi wa xaxlikana xlakgmaxtuna kakilhtamaku”.