Хосталыышкын байырлалының соонда Иисус өөреникчилери-биле Галилеяже чорупкан. Олар Самарияны таварып, Сихар хоорайның чоогунда Иаковтуң кудуунуң чанынга дыштанып алыр дээш доктаапканнар. Иисус өөреникчилерин аъш-чем садып эккээр кылдыр хоорайже чоргузупкан.

Ол үеде бир херээжен кижи кудуктан суглап чедип келген. Иисус оон: «Сууңдан меңээ берем» — деп дилээн. «Сен иудей хиреңде, канчап самарий херээжен менден ижер суг дилээриң ол?» — деп, ол айтырган. Иисус: «Кым сенден суг дилеп турарын билген болзуңза, бодуң-на сугну дилей бээр ийик сен. Ынчан мен сеңээ амыдырал хайырлаар сугну бээр мен» — дээн. «Кандыг уткалыг? Сенде хумуң безин чок ышкажыл» — деп, херээжен чугаалаан. Иисус аңаа: «Мээң бээр суумну ижер улус кажанда-даа суксавас» — деп харыылаан. «Дээрги, меңээ ол сууңардан бериңерем» — деп, херээжен дилээн.

Ынчан Иисус мынча дээн: «Ашааңны бээр кыйгырып алгаш, чедип кел». «Мээң ашаам чок» — деп, ол харыылаан. Иисус: «Сен шын чугааладың, беш катап өгленген сен, амгы чурттап турар кижиң — ашааң эвес-тир» — дээн. Херээжен кижи кайгай бергеш: «Сен шынап-ла медээчи-дир сен. Бистиң ада-өгбевис бо дагга Бурганга тейлеп чораан, а иудейлер тейлээр чер чүгле Иерусалимде дээр. Мессия чедип келгеш, биске шупту чүвени тайылбырлап бээр деп бүзүрээр  мен» — дээн. Ынчан Иисус кымга-даа чугаалавааны сөстерин: «Мен Мессия-дыр мен» — деп чугаалаан.

Ол хоорайже баргаш, улуска: «Мен Мессияны тып алдым. Ол мээң дугайымда шуптузун билир болду. Барып көрүңер даан!» — дээн. Олар ооң-биле кады кудукче баргаш, Иисусту дыңнап эгелээннер.

Самарий чон Иисусту артып каарын дилээрге, ол оларны ийи хонук ишти өөредип келген. Оларның хөй кезии аңаа бүзүрей берген. Чон херээженге: «Ол делегейниң камгалакчызы-дыр деп ам-на билип алдывыс» — дишкен.