Nyanok i ng’ei ma Yesu ulimo batizo, ecaku rweyo kumae: ‘Ker pa Mungu udhingo.’ Julub pare gilubo ng’eye kinde m’ebewotho i kind ng’om mi Galilaya man mi Yahudi. Kinde ma Yesu udok i Nazareti ma tie adhura pagi, ecidho i sinagog man ewok eyabu kithabu m’adola pa Isaya, e esome ku dwande ma tek kumae: ‘Yehova umio ira tipo maleng’ kara arwei lembanyong’a.’ Thelembe mi wec maeno ubino ang’o? Thelembene ubino nia kadok nwang’u dhanu gibino mito ginen udu ma Yesu ubetimo de, re thelembe ma dit m’uketho enwang’u tipo maleng’ utie pi nirweyo lembanyong’a. Pieno, eyero ni dhanu m’ubewinje kumae: ‘Tin, lembila maeni udaru pong’o.’

I ng’eye, Yesu ucidho i dhu nam mi Galilaya, ka m’ewok enwang’u i ie judwar rec ang’wen ma gidoko ni julub pare. Elwong’ogi man eyero igi kumae: ‘Wubin man abidwokowu ni judwar dhanu.’ Ju m’elwong’one ubino: Petro, Andrea, Yakobo man Yohana. E ndhundhu nica giweko tic migi mi dwaru rec man gilubo ng’eye. Giwotho i Galilaya ceke ma giberweyo pi Ker pa Yehova. Girweyo i sinagog, i soko, man i ndaki. Udul dhanu ma lee ubed ulubo tokgi kaka ceke ma gibecidho i ie. Rwonglembe ma juyero iwi Yesu uyik i kaka ceke cil bor i Cami.

Nindo moko i ng’eye, Yesu ugam umio copo mi keyo kum dhanu man mi wodho pajogi ni julub pare moko. Jumange gibed gicidho gikugi kinde m’eberweyo kubang’ adhura man kubang’ pacu. Jumamon dupa ma giweg bedopwe, calu ve: Maria Magdalene, Yoana man Susana ku jumange de gibed gikonyo Yesu karacelo ku julubne.

I ng’ei ma Yesu uponjo julub pare, egam eorogi gicidh girwei. Kinde ma giwotho i Galilaya zoo pi nirweyo, dhanu mange dupa gigam gidoko julub man gilimo batizo. Pieno dhanu dupa gimito gibed julub pa Yesu, uketho eporogi ku podho ma cam m’i ie tie ayika pir akaya. Eyero kumae: ‘Wukwai Yehova uor jutic pi nikayu cam.’ I ng’eye, eng’io julub 70 man eorogi ario ario pi nirweyo i  ng’om Yahudi zoo. Giponjo kwond dhanu ceke iwi Ker pa Mungu. Kinde ma julub udwogo i bang’ Yesu, gibedo kud anyong’a nikoro ire lembe m’utimere. Gin moko acel de mbe ma Wonabali copo timo pi nijigo tic mi rweyo lembanyong’a.

Yesu utimo lembe ceke wek kara julub pare gimediri ku tic maeno ma pire tek i ng’ei m’ebidok i polo. Egam eyero igi kumae: ‘Wurwei lembanyong’a i ng’om zoo. Wuponj dhanu ku lembe pa Mungu man wumii igi batizo.’