Ndék ngéda i mbus sôble yé, Yésu a bôdôl téé likalô, a kalak le: ‘Ane Djob i yé bebee.’ Banigil ba bi noñ nye kiki a bé hiôm i Galiléa ni Yudéa. Ngéda Yésu a bi témb i mbai yé i Nasaret, a ke i ndap bibégés, a yibil kaat Yésaya, a soñgol yo makeñi le: ‘Yéhôva a nti me mbuu mpubi kayéle me lah añal ñañ nlam.’ Kii hala a bé kobla? A bé kobla le to ibale bôt ba bé noñ Yésu inyu manyaga a bé boñ, njom bisu a bi ôma hana isi i bé le a añal ñañ nlam. Ndi a añle baemble nye le: ‘Len, ini mbañ i nyon.’

I mbus, Yésu a ke i tuye Galiléa, i het a bi boma banigil bé ba-na, ba ba bé balop tjobi. A sébél bo, a kal bo le: ‘Loga ni me, me ga yilha bé balop bôt.’ Môl map ma bé le: Pétrô, Andréa, Yakôbô, ni Yôhanes. Kunda yada, ba téé bôlô yap i lop tjobi, ba noñ nye. Ba bi hiôm ni Galiléa nyensôna inyu añal Ane Yéhôva, ba bé añal yo i mandap ma bibégés, bahoma ba bôm, ni i minloñ. Limut likeñi li bé noñ bo to hee homa ba bé ke. Miñañ inyu Yésu mi bi tjama homa nyensôna, ikepam i loñ Siria.

Yésu a bi bem loñge ngéda inyu ti banigil bé ngui i mélés bakokon ni pémés mimbuu mimbe. Bôt bape ba bi ke ni nye mu kiki a bé añal ñañ nlam ikété bitison ni mambai. Yak bôda ba hémle kiki bo Maria Magdaléna, Yôhana, Susana ni bape, ba bé nit, ba hôlga Yésu ni banigil bé mu maké map.

Yésu a mal bañ uñgus banigil bé, a om bo i tjam miñañ minlam. Kiki ba bé hiôm ni Galiléa nyensôna ngandak bôt i bi yila banigil, i sôblana ki. Ngandak bôt kiyaga i bé gwés yila banigil ba Yésu, jon a bi kal le ba yé wee wom u u yé bebee ni ngéda mabumbul. A kal le: ‘Ni soohe Yéhôva le a om ngandak babumbul.’ I mbus mam mana, a pohol 70 ma banigil bé, a om bo iba iba i añal ñañ nlam i Yudéa nyensôna. Ba bé niiga  mintén mi bôt nwomisôna Ane Djob. Banigil ba huu bañ, ba bééna ngôñ i pala añle Yésu mam ma bi pémél bo. Nsohop a bé bé le a sôñga nson u añal miñañ minlam.

Ilole a ntémb i ngii, Yésu a bi yoñ bitelbene le unu soso nson u kônde ke ni bisu. A kal banigil le: ‘Añlana ñañ nlam ni nkoñ isi wonsôna. Ni niigaga bôt Bañga i Djob, ni sôblege bo.’