Dung tardidi Jesus, mulai ma dipaboa ibana tu angka halak, ‘Nunga jonok Harajaon ni Debata.’ Dohot do angka muridna marbarita tu Galilea dohot tu Judea. Dung mulak Jesus tu Nasaret, lao ma ibana tu sinagoga. Dijahahon ibana ma gulungan Jesaya na mandok, ‘Dilehon Jahowa do tondi parbadia tu ahu laho paboahon barita na uli.’ Aha do lapatan ni i? Laho paboahon barita na uli do dilehon Debata tu ibana tondi parbadia, ndang holan mambahen mukjizat. Dung i didok Jesus ma, ‘Sadari on saut ma na didok di ayat on.’

Dung i lao ma Jesus tu Laut Galilea. Pajumpang ma ibana disi dohot si Petrus, si Andreas, si Jakobus dohot si Johannes. Panjala dengke do nasida. Didok Jesus ma, ‘Ihuthon ma ahu asa hubahen hamu gabe sijala jolma.’ Ditinggalhon nasida ma karejo ni nasida, jala gabe murid ni Jesus ma nasida. Laho ma nasida tu sude luat di Galilea, paboahon Harajaon ni Jahowa. Dipaboa nasida do i di sinagoga, di pajak manang di onan dohot di angka dalan. Tudia pe nasida lao godang do halak na mangihuthon nasida. Tarbege ma barita taringot Jesus tu sude inganan sahat tu Siria.

Dung i, dilehon Jesus ma huaso tu piga-piga muridna laho pamalumhon na marsahit dohot mangusir suru-suruan na jahat manang malaikat na jahat. Na deba nai, laho do marbarita dohot Jesus tu angka kota dohot tu huta-huta. Adong do angka borua na porsea tu ibana, songon si Maria Magdalena, si Johanna, si Susana dohot na asing. Nasida ma na mangalehon na porlu tu Jesus dohot tu angka muridna.

Dung diajari Jesus angka muridna, disuru ma nasida marbarita. Lao ma nasida tu Galilea. Godang ma na gabe murid ni Jesus jala tardidi. Alani i dipatudos Jesus ma nasida songon ladang na laho dipanen. Didok ma, ‘Pangido ma tu Jahowa asa dilehon godang parkarejo na laho mamanen.’ Dipillit Jesus ma 70 halak muridna. Disuru ma nasida dua halak sapardalanan paboahon barita na uli  tu Judea. Diajari nasida do sude halak taringot Harajaon ni Debata. Dung mulak, las ma roha ni nasida. Diceritahon nasida ma i tu Jesus. Tangkas ma ndang boi Sibolis mangambati ulaon marbarita.

Lomo do roha ni Jesus asa torus marbarita angka muridna nang pe nunga lao ibana tu surgo. Didok ibana ma tu nasida, ‘Paboa hamu ma barita na uli tu sude inganan di portibi on. Ajari ma nasida taringot Hata ni Debata, jala didi ma nasida.’