Kenca Jesus ibaptis, mulai me ia erberita, ‘Lanai ndekah, reh me Kerajan Dibata.’ Murid-muridna pe ikut ras ia ku Galilea ras ku Judea. Sanga mulih Jesus ku kutana, Nasaret, lawes me ia ku sinagoga, ntah pe rumah pertoton. I je, ibukana me kitap Jesaya, nce ibacana, ‘Nggo ibere Jahwe aku kesahNa si badia gelah banci aku erberita si meriah.’ Kai nge maksudna e? E ertina, amin pe meriah akap kalak ngidah mukjizat si iban Jesus, tapi situhuna tujun kesah si badia eme gelah banci Jesus erberita. Nce, ikatakenna me man kalak si lit i je, ‘Gundari, nggo terjadi kai si tertulis enda.’

Kenca e, lawes me Jesus ku Laut Galilea. I je, jumpa ia ras empat muridna si dahinna nangkap nurung, eme Petrus, Andreas, Jakup, ras Johanes. Iundangna me kalak e, nina, ‘Mari ikuti aku, gelah kuban kam jadi kalak si nangkap manusia.’ Mis itadingken kalak e dahinna, nce ikutina Jesus. Iberitaken kalak e me kerna Kerajan Jahwe i kerina daerah Galilea. Erberita kalak e i sinagoga, i pajak, bage pe i dalan-dalan. Melala kalak si ngikut-ngikut Jesus ras murid-muridna. Seh me berita kerna Jesus ku ja pa pe, termasuk ku Siria.

Kenca si e, ibereken Jesus kuasa man piga-piga muridna gelah banci kalak e mpepalem kalak si sakit ras mpelawes roh jahat. Muridna si deban ikut ras ia guna erberita arah kota ku kota ras kuta ku kuta. Mbue diberu-diberu si setia si mereken keperlun Jesus ras murid-muridna, termasuk Maria Magdalena, Johana, Susanna, ras si debanna.

Kenca iajarina murid-muridna, isuruh Jesus me kalak e erberita. Sanga kalak e erberita i Galilea, melala kalak si nggit jadi murid, janah ibaptis. Melala kel kalak si nggit jadi murid Jesus, ban buena ipeseri Jesus ras page si nggo banci iperani. Nina, ‘Pindolah man Jahwe gelah iberena terbuen kalak si mperanisa.’ Dung e, ipilih Jesus me 70 murid, isuruhna kalak e erberita dua-dua kalak ku kerina daerah Judea. Iajarken kalak e me kerna Kerajan man kerina kalak. Sanga kalak e mulih, meriah kel ukur kalak e nceritaken pengalamenna man Jesus. La banci ipengadi Setan kalak e erberita.

Ikataken Jesus man murid-muridna, ‘Beritakenlah enda ku sebelang doni. Ajari kerina kalak kerna kata Dibata, ras baptislah kalak e.’ Enda ikataken Jesus gelah terus ilakoken murid-muridna pendahin si penting e sanga ia nggo i surga.