Murusun dan lárigiñe labadiseirun Hesusu, aba lagumeserun apurichiha: “Yarafaali Larúeihan Bungiu”. Aweiyasuhatiña lani disipulugu luma lidan sun Galiléa luma Hudéa. Danti lagiribudunbei Hesusu Nasarétün, fulasu le ñein lubéi laweirida, beluti tidoun haligilisin huríu, aba ladaarunu líburu hóuburatu to labürüdüboun Isaíasi, ábati laliihanu lau umalali héreti: “Rúhali Heowá sífiri sandu nun lun napurichihani uganu buiti”. Ka mini lubéi lira? Busentiña meha gürigia harihini Hesusu adaagua milaguru ani mámarügüñein meha lun lira lichugúa sífiri sandu lun Hesusu, lúntima meha lapurichihani uganu buiti luáguti Larúeihan Bungiu lichugúa lun. Lariñaga houn ha aganbubalin: “Uguñe lagunfulira profesía le”.

Lárigiñe, aba lidin Hesusu lubadun duna Galiléa, ñein lasubudira gádürü wügüriña ha meha nadagimeinbaña eseniha, dan lárigiñe, aba lánihaña lan disipulugu. Amisuraha lumutiña lau dimurei burí le: “Ñübuin humá numoun, ábame nadügün lun hanaahan gürigia nun”. Féduru, Andürési, Santiagu luma Huan híribei. Ígira hamuti hawadigimari keisi esenihatiña lau lóufudagun lun houdin luma. Éibuga hamuti sun Galiléa apurichihei uganu luáguti Larúeihan Heowá. Apurichihatiña tidan burí haligilisin huríu, mágidurugu luma ǘmada. Ñǘdüntiña meha bandi gürigia hárigi le ñeinhin lumuti houdin. Aganbúati luagu Hesusu lidan sun fulasu, íbini lidan ageiraü díseti le gíribei Siria.

Lau lásügürün dan, aba líchugun Hesusu ubafu houn fiu hádangiñe lánigu lun hareidaguagüdün sánditiña luma lun hasagahan sífirigu wuribatiña. Híbiri, aba houdin apurichiha luma lidan burí uburugu luma lirahüñü fulasu. Ñǘdüntu giñe María Mágüdalena, Huana, Susana hámaya amu würiña úaraguatiña óunigirei Hesusu hama lánigu.

Óunaha lumutiña Hesusu lani disipulugu apurichiha, lárigiñe larufudahan houn. Lidan haweiyasuhan lumúanrugu Galiléa, adügatiña bandi disipulugu, badisei hamaña. Kei meha busén habéi bandi gürigia lun lánigu hamá Hesusu disipulugu, aba lariñagun ítara haña lan kei bunaguaü le aranseeli lun lalubahóun. Ariñagati: “Furíei humá lun Heowá lun lóunahan hanwoun nadagimeintiña lun halubahan”. Lárigiñe,  anúadirati 70 hádangiñe lani disipulugu, ábati lóunahaniña bián bián lun hapurichihan lidan sun Hudéa. Arufudahatiña houn sun hawuyeri gürigia luagu Larúeihan Bungiu. Dan le hagiribudunbei disipulugu, abahüdagua hamuti lun Hesusu lau ugundani ida liña lan lidin houn. Siñati meha ladügün Mafia ni kata lun lararamuni wadagimanu lánina apurichihani.

Aranseha lumuti meha Hesusu sun le mégeiwabei lun hasigirun lani disipulugu adügei wadagimanu súdiniti le lárigiñeme lagiribudun sielun. Ariñagati houn: “Apurichiha huméi uganu buiti luáguti Larúeihan Bungiu lidan sun fulasu ubouagu. Arufudaha huméi Lererun Bungiu houn gürigia ani badisei humaña”.