Pa lontan apre son batenm, Zezi ti konmans prese: ‘Rwayonm Bondye i pros.’ Son bann disip ti swiv li anmezir ki i ti al partou Galile ek Zida. Ler Zezi ti retourn Nazaret, lavil kot i ti’n grandi, i ti al dan sinagog. I ti ouver liv profet Izai e i ti lir aotvwa: ‘Zeova in donn mwan son lespri sen pour mwan anons sa bon nouvel.’ Ki sa ti verdir? Savedir ki menm si dimoun ti anvi vwar Zezi pe fer mirak, rezon prensipal ki i ti’n ganny lespri sen ti pour li anons sa bon nouvel. Apre i ti dir bann ki ti pe ekout li: ‘Ozordi, sa parol in ganny akonpli.’

Apre sa, Zezi ti al kot Lanmer Galile, kot i ti zwenn kat peser ki ti vin son bann disip. I ti envit zot pour swiv li e dir: “Swiv mwan e mon pou fer zot lapes dimoun.” Sa ti Pyer, Andre, Zak ek Zan. Deswit zot ti aret zot biznes lapes e zot ti swiv li. Zot ti al partou Galile e pres lo Rwayonm Zeova. Zot ti pres dan sinagog, dan bazar e lo semen. En gran lafoul ti swiv zot partou kot zot ti ale. Nouvel lo Zezi ti fannen partou kote, menm ziska Siri.

Avek letan, Zezi ti donn serten son bann disip pouvwar pour geri dimoun e sas demon. Serten ti al avek li ler i ti pe prese dan bann lavil ek vilaz, enn apre lot. I ti annan detrwa madanm fidel, par egzanp Mari Magdalenn, Zann, Sizann ek lezot madanm ki ti pran swen avek Zezi ek son bann disip.

Apre ki i ti’n form son bann disip, Zezi ti anvoy zot al prese. Anmezir ki zot ti prese Galile, en kantite dimoun ti vin disip e ganny batize. I ti annan sitan en kantite dimoun ki ti anvi vin disip ki Zezi ti dir ki zot parey en plantasyon ki ti’n pare pour ganny rekolte. I ti dir: ‘Demann Zeova dan lapriyer pour anvoy plis travayer pour anmas rekolt.’ Pli tar, i ti swazir 70 disip e anvoy zot, de par de, pour pres partou dan Zide. Zot ti koz avek tou sort kalite dimoun lo Rwayonm. Ler bann disip ti  retournen, zot ti eksite pour rakont Zezi sa ki ti’n arive. Dyab pa ti kapab fer nanryen pour aret sa travay predikasyon.

Zezi ti fer sir ki son bann disip ti kontinyen fer sa travay enportan menm apre ki i ti’n al dan lesyel. I ti dir zot: ‘Anons sa bon nouvel partou lo later. Ansenny dimoun Parol Bondye e batiz zot.’