Scho glii nach sinere Taufi fangt Jesus a de Mensche z verzelle: «S Königriich vo Gott isch glii da.» Er gaht dur Galiläa und Judäa und sini Jünger göhnd mit ihm mit. Wo er einisch z Nazareth isch, i dere Stadt, wo er ufgwachse isch, gaht er i d Synagoge. Dört macht er d Jesaja-Buechrolle uf und list drus vor: «Jehova het mir heilige Geischt gee, dass ich di gueti Botschaft predige cha.» Nachher seit er zu dene, wo ihm zueglost hend: «Hüt het sich die Prophezeiig erfüllt.» Was meint echt Jesus mit dem? D Lüt wend zwar gseh, wie er Wunder wirkt, aber de heilig Geischt het er vor allem für s Predige vo de guete Botschaft übercho.

Nachher gaht Jesus zum Galiläische Meer. Dört trifft er vier vo sine Jünger. Si heissed Petrus, Andreas, Jakobus und Johannes und si sind Fischer. Er seit zu ihne: «Chömmed mit mir mit und ich mache us euch Menschefischer.» Si höred sofort uf, als Fischer z schaffe und göhnd mit ihm mit. Zäme wandered si dur ganz Galiläa und verzelled vom Königriich vo Jehova. Si prediged i de Synagoge, uf em Määrt und uf de Strass. Ganz vil Lüt göhnd mit ihne überall mit hii. Sogar bis Syrie ghört mer devo, was Jesus alles macht.

Später git Jesus es paarne vo sine Jünger d Macht, dass si chönnd Chranki heile und Dämone ustriibe. Es paar anderi begleited ihn, wo er vo Stadt zu Stadt und vo Dorf zu Dorf tuet predige. E Gruppe vo Fraue, wo a Jesus glaubt, luegt, dass es ihm und sine Jünger guet gaht. Zu dene Fraue ghöred d Maria Magdalene, d Johanna und d Susanna.

Nachdem Jesus sine Jünger ganz vil biibracht het, schickt er si los in Dienscht. Währenddem si in ganz Galiläa unterwegs sind, werded vil Mensche Jünger vo Jesus und lönd sich la taufe. Es wend so vil sini Jünger werde, dass Jesus si grad miteme Feld vergliicht, wo parat isch zur Ernti. Er seit: «Beted zu Jehova, dass er meh Lüt schickt, wo bim Ernte helfed.» Später wählt Jesus 70 Jünger us und schickt si z zweite los, dass si überall z Judäa chönnd go predige. Si verzelled ganz verschidene Lüt vom Königriich. Wo si zruggchömmed, verzelled si Jesus ganz begeischteret, was si alles erlebt hend. De Tüfel cha das Predigtwerk unmöglich stoppe!

Jesus wird ja wider i Himmel zruggah und drum luegt er, dass sini Jünger mit dere wichtige Ufgab chönnd wiitermache. Er seit zu ihne: «Tüend di gueti Botschaft uf de ganze Erde predige. Erkläred de Mensche s Wort vo Gott und tüend si taufe.»