Maʼaka jeʼra kaʼi süchikijee nuwoutisaajünüin Jesuu, oʼttushi nia sünain aküjaa pütchi. Maʼwaishi nia: «Alüʼütsü nükalia chi Maleiwakai süpüla Aluwatawaa». Oʼunawaishii na nikirajüinkana nümaa suluʼupünaa tü mmakat Galilea otta Judea. Nüleʼejapa Jesuu nüchikuaʼa Nazaretmüin, oʼunushi nia eemüin tü ekirajüleekat na judíokana jee nujutatka tü pütchi nünüikimaajatkat Isaías, anuu tü pütchi naashajeʼerakat: «Naapüin tamüin Jeʼwaa chi naaʼinkai süpüla taküjain tü pütchi anasükat». ¿Kasa nüküjeeka achiki Jesuu? Neʼreein maʼin na wayuukana naainjain Jesuu kasa pülasü napüleerua. Nnojotpejeʼe naapüin Jeʼwaa nümüin Jesuu chi naaʼinkai süpüla naainjain neʼe kasa pülasü, süpülajatü nüküjain maʼin tü pütchi anasükat. «Ekeraajüsü pütchikat tüü soʼukai», nümaka Jesuu namüin na aapajakana nünüiki.

Nuʼunaka Jesuu mapa eemüin tü palaakat Galilea. Niʼraka pienchishii wayuu olojulii jime. «Anashii tamaatalai jia. Maa aka olojüliin jia jime, okotchajüinjana jia wayuu tamüin», nümaka namüin. Anuu nanülia: Pedro, Andrés, Santiago otta Juan. Napütüin tü nakusuinkat süpüleerua oʼunaa nümaa Jesuu. Noʼunaka nümaa Jesuu sainküinpünaa Galilea sünain aküjaa süchiki nukuwaʼipa Maleiwa sünain Aluwatawaa. Ekirajüshii naya pütchi suluʼupünaa tü ekirajüleekat na judíokana, metkaaruluʼu otta pueulopaʼa. Wainma wayuu anoujakana sutuma nanüiki eepünaale naya. Suʼwalakajaaka nüchiki Jesuu wattapünaa maʼin otta aapünüsü nüchiki sainküinpünaa tü mmakat Siria.

Naapaka Jesuu laülawaa namüin waneinnua nikirajüin süpüla neiyajüin wayuu eekai ayuulin jee süpüla nojuʼitirüin yolujaa süleʼeruʼujee wayuu. Eeshii waneinnua oʼunakana nümaa Jesuu sünain aküjaa pütchi suluʼupünaa tü pueulokalüirua. Eejana jieyuu kanoulaka maʼin nünain chi Maleiwakai. Anuu nanülia noʼutku: María Magdalena, Juana, Susana otta waneirua, akaaliinjünüshi Jesuu otta na nikirajüinkana natuma.

Kettaajapa niʼiküin Jesuu na nikirajüinkana, nüjütüin naya sünain aküjaa pütchi. Sutuma naküjain pütchi suluʼupünaa tü mmakat Galilea, wainma na wayuu anoujakana nünain Jesuu otta na woutiisakana. Wainma na wayuu anoujeekana nünain Jesuu, müsüjeseʼe nüküjain müin aka saaʼin naya wanee aʼttiee kettaaka süpüla okotchojünaa achon. «Juchunta nümüin Jeʼwaa nuluwataaiwa nooʼomüin wayuu süpüla nakotchojüin süchon tü aʼttieekat», nümaka Jesuu. Mapa, nüneeküin Jesuu 70 nikirajüin jee nüjütüin naya piamawai sünain  aküjaa pütchi suluʼupünaa Judea. Aashajaashii naya sümaa wayuu maʼleekalia süchiki Nuluwataaya Maleiwa. Naleʼejapa nachikuaʼa, watta saalii kasa anasü naküjeeka nümüin Jesuu süchiki tü naainjakat. Isaleesia nüchiki chi Yolujaakai nüshaʼwaleʼerüin tü aküjaakat pütchi.

Niʼiküin Jesuu na nikirajüinkana süpülapünaa nuʼunuin iipünaamüin süpüla ayatüinjanain naküjain pütchi. Anuu nünüiki namüin: «Jüküja jümaala tü pütchi anasükat suluʼupünaa mmakat süpüshuaʼa. Jikiraja wayuu sünain tü Nünüikikat Maleiwa sümaa juwoutisaajüin naya».