Ojlẹ vude to baptẹm Jesu tọn godo, e jẹ yẹwhehodọ ji dọmọ: ‘Ahọluduta Jiwheyẹwhe tọn ko sẹpọ.’ Devi lẹ nọ hodo e dile e to gbejizọnlinzin gbọn lẹdo Galili po Jude po tọn lẹ mẹ. To whenue Jesu lẹkọyi tòdaho etọn titi mẹ to Nazalẹti, e yì sinagọgu mẹ bo hùn owe-hihá Isaia tọn bosọ hia ẹ daga dọmọ: ‘Jehovah ko na mi gbigbọ wiwe etọn, na yẹn nido sọgan dọyẹwheho wẹndagbe lọ tọn.’ Etẹwẹ enẹ zẹẹmẹdo? E zẹẹmẹdo dọ dile etlẹ yindọ ojlo gbẹtọ lẹ tọn wẹ yindọ Jesu ni to azọ́njiawu lẹ wà, whẹwhinwhẹ́n titengbe he wutu e do mọ gbigbọ wiwe yí wẹ nado lá wẹndagbe lọ. Whenẹnu, e dọna todoaitọ etọn lẹ dọmọ: ‘Egbehe wẹ dọdai ehe mọ hẹndi.’

Enẹgodo, Jesu yì Ohù Galili tọn tó, fihe e mọ ẹnẹ to devi etọn lẹ mẹ te he yin whèhutọ lẹ. E basi oylọna yé dọmọ: ‘Mì hodo mi, yẹn nasọ yí mì do basi whèhutọ gbẹtọ lẹ tọn.’ Devi lọ lẹ wẹ Pita, Andle, Jakọbu po Johanu po. Yé jo ajọ́ whèhuhu tọn yetọn do bo hodo e to afọdopolọji. Yé gbọn lẹdo Galili tọn lẹpo mẹ bo to yẹwhehodọ gando Ahọluduta Jehovah tọn go. Yé dọyẹwheho to sinagọgu lẹ mẹ, to ahi lẹ mẹ podọ to aliho lẹ ji. Gbẹtọgun daho de sọ nọ hodo yé yì fidepope he yé to yìyì. Linlin lẹ sọ gbayipe gando Jesu go gbọn filẹpo, etlẹ yin kaka yì Silia.

To nukọn mẹ, Jesu na huhlọn delẹ to hodotọ etọn lẹ mẹ nado hẹnazọ̀ngbọna gbẹtọ lẹ bo yàn aovi lẹ jẹgbonu. Mẹdevo lẹ nọ to hihodo e dile e to yẹwhehodọ sọn tòdaho de mẹ jẹ devo mẹ, podọ sọn gbétatò de mẹ jẹ devo mẹ. Yọnnu nugbonọ delẹ, taidi Malia Magdaleni, Joana, Susana po mẹdevo lẹ po nọ penukundo nuhudo Jesu po hodotọ etọn lẹ po tọn go.

To whenue Jesu ko plọnazọ́n devi etọn lẹ godo, e do yé hlan nado yì dọyẹwheho. Dile yé to gbejizọnlinzin pé gbọn Galili, mẹsusu devo lẹ lẹzun devi lẹ bo yin bibaptizi. Mẹhe jlo na lẹzun devi lẹ sù sọmọ bọ Jesu yí yé jlẹdo ogle he ko bia na gbingbẹ̀n de go. E dọmọ: ‘Mì hodẹ̀ dọ Jehovah ni do azọ́nwatọ susu hlan, na yé nido bẹ jinukun lẹ wá whé.’ To nukọn mẹ, e de devi 70 bo do yé hlan awe-awe nado dọyẹwheho  gbọn lẹdo Jude tọn lẹpo mẹ. Yé plọnnu gbẹtọ wunmẹ lẹpo gando Ahọluduta lọ go. Whenue devi lọ lẹ lẹkọ, yé to jejeji nado dọ nuhe jọ lẹ na Jesu. Nudepope ma tin he Lẹgba gán wà nado doalọtena azọ́n yẹwhehodidọ tọn lọ.

Jesu hẹn ẹn diun dọ devi etọn lẹ na zindonukọn to azọ́n titengbe ehe wiwà mẹ to whenue ewọ na ko lẹkọyi olọn mẹ. E dọna yé dọmọ: ‘Mì dọyẹwheho wẹndagbe lọ tọn gbọn aigba lẹpo ji. Mì plọnnu mẹlẹ gando Ohó Jiwheyẹwhe tọn go bo baptizi yé.’