Pagkatapos nabawtismuhan si Jesus, ginsugdan dayon niya ang pagbantala: ‘Ang Ginharian sang Dios malapit na.’ Nag-upod ang mga disipulo sa iya paglakbay sa bilog nga Galilea kag Judea. Sang nagbalik si Jesus sa ila banwa sa Nazaret, nagkadto sia sa sinagoga, ginbuksan ang linukot ni Isaias, kag ginbasa ini sing matunog: ‘Ginhatag ni Jehova sa akon ang balaan nga espiritu agod makabantala ako sang maayong balita.’ Ano ang buot silingon sini? Buot silingon, bisan pa gusto sang mga tawo nga makita si Jesus nga nagahimo sing milagro, ang panguna nga rason kon ngaa nakabaton sia sing balaan nga espiritu amo ang pagbantala sang maayong balita. Dayon ginsilingan niya ang mga nagapamati sa iya: ‘Natuman na ini nga tagna subong.’

Dayon nagkadto si Jesus sa Dagat sang Galilea, diin nakilala niya ang iya apat ka disipulo nga mga mangingisda. Gin-agda niya sila nga nagasiling: “Magsunod kamo sa akon, kay himuon ko kamo nga mga mangingisda sang mga tawo.” Sila amo si Pedro, si Andres, si Santiago, kag si Juan. Ginbayaan dayon nila ang ila negosyo nga pagpangisda kag nagsunod sa iya. Nagkadto sila sa bilog nga Galilea nga nagabantala parte sa Ginharian ni Jehova. Nagbantala sila sa mga sinagoga, sa mga merkado, kag sa mga dalan. Madamo nga tawo ang nagasunod sa ila bisan diin sila magkadto. Naglapta ang balita parte kay Jesus, kag nakalab-ot ini sa malayo asta sa Siria.

Sang ulihi, ginhatagan ni Jesus ang iya mga sumulunod sing gahom sa pagpang-ayo sang mga tawo kag pagpagua sang mga demonyo. Ang iban nagbantala upod sa iya sa mga siudad kag sa mga baryo. Ang pila ka matutom nga babayi, pati na si Maria Magdalena, si Juana, si Susana, kag iban pa, amo ang nag-atipan kay Jesus kag sa iya mga sumulunod.

Sa tapos mahanas ni Jesus ang iya mga disipulo, ginpadala niya sila para sa pagbantala. Sang ginkadtuan nila ang bilog nga Galilea, madamo pa ang nangin disipulo kag nagpabawtismo. Madamo gid katama ang gusto mangin disipulo amo nga ginkomparar sila ni Jesus sa uma nga alanyon na. Sia nagsiling: ‘Pangamuyo kamo kay Jehova nga magpadala sing madamo pa nga mangangani sa pag-ani sang  alanyon.’ Sang ulihi, nagpili sia sing 70 halin sa iya mga disipulo, ginpares sila sing tagduhaduha, kag ginpadala para magbantala sa bilog nga Judea. Gintudluan nila ang tanan nga klase sang tawo parte sa Ginharian. Sang nagbalik ang mga disipulo, nalipay sila nga isugid kay Jesus ang natabo. Wala sing mahimo ang Yawa para punggan ang pagbantala.

Ginsigurado ni Jesus nga mapadayon sang iya mga disipulo ini nga hilikuton bisan pa makabalik na sia sa langit. Ginsilingan niya sila: ‘Ibantala ninyo ang maayong balita sa bilog nga duta. Tudlui ninyo ang mga tawo parte sa Pulong sang Dios, kag bawtismuhi ninyo sila.’