Tsis ntev tom qab Yexus ua kevcai raus dej, nws pib tshaj tawm tias: ‘Vajtswv lub Nceeg Vaj los ze lawm.’ Yexus cov thwjtim raws nws qab mus thoob plaws lub xeev Kalilais thiab lub xeev Yudia. Thaum Yexus rov los txog hauv Naxale uas yog lub zos nws loj hlob, nws mus hauv lub tsev sablaj. Nws txawm nthuav phau ntawv Yaxaya thiab nyeem nrov nrov hais tias: ‘Yehauvas lub hwj huam dawb huv nrog nraim kuv, nws txib kuv mus tshaj txoj xov zoo.’ Qhov uas hais li no yog li cas tiag? Yexus xav kom cov neeg Naxale paub tias nws tau txais lub hwj huam dawb huv tsis yog kom nws ua tau ntau yam txujci rau lawv pom tiamsis yog mus qhia txoj xov zoo rau lawv hnov. Yexus hais rau cov tibneeg tias: ‘Zaj lus faj lem uas nej tau hnov kuj tiav rau hnub no lawm.’

Yexus txawm mus ntawm ntug Hiavtxwv Kalilais thiab ntsib 4 tug txivneej ntaus ntses, nws hu lawv los ua nws cov thwjtim. Lawv yog Petus, Anru, Yakaunpau, thiab Yauhas. Yexus caw lawv tias: ‘Nrog kuv mus, kuv yuav tsa nej ua cov uas npo neeg ib yam li npo ntses.’ Lawv txawm muab lawv txoj haujlwm ntaus ntses tso tseg. Lawv thiaj mus tshaj tawm Yehauvas lub Nceeg Vaj thoob plaws lub xeev Kalilais. Lawv qhia hauv tej tsev sablaj, ntawm tej tshav puam, thiab ntawm tej kev. Muaj neeg coob coob raws lawv qab mus rau txhua txhia qhov chaw. Yexus lub moo nrov ncha lug mus txog ntua lub xeev Xilia.

Ntev mus, Yexus kuj muab hwjchim rau nws cov thwjtim kom lawv ntiab tau dab tawm thiab kho tau tibneeg zoo. Muaj ib txhia nrog Yexus mus tshaj tawm ib lub xeev dhau ib lub xeev thiab ib lub zos dhau ib lub zos. Muaj ib co pojniam muaj kev ntseeg heev uas tos txais Yexus thiab cov raws Yexus qab. Lawv yog Maivliag Madala, Yau-ana, Xuxana, thiab lwm cov.

Thaum Yexus cob qhia nws cov thwjtim tas, nws txawm txib lawv mus tshaj tawm. Lawv thiaj mus tshaj tawm thoob plaws Kalilais ces txawm muaj cov los ua thwjtim thiab ua kevcai raus dej. Muaj coob tus xav los ua Yexus cov thwjtim, vim li ntawd Yexus thiaj muab lawv piv ib yam li tej qoob uas tabtom zoo hlais lawm. Nws hais tias: ‘Thov Yehauvas txib tub zog mus hlais nws tej qoob.’ Yexus thiaj xaiv 70 leej thwjtim thiab txib ib nkawg ib nkawg mus tshaj tawm thoob plaws lub xeev Yudia. Cov  thwjtim mus qhia rau ntau hom neeg txog Vajtswv lub Nceeg Vaj. Thaum cov thwjtim rov qab los txog, lawv maj nroos xav piav tej uas lawv tau ntsib rau Yexus mloog. Dab Ntxwg Nyoog yeej tav tsis tau tes haujlwm tshaj tawm txog txoj xov zoo li.

Yexus saib xyuas kom nws cov thwjtim rau siab ua tes haujlwm tseem ceeb no, vim yav tom hauv ntej nws yuav rov qab mus saum ntuj ceeb tsheej. Nws hais rau lawv tias: ‘Tshaj tawm txoj xov zoo mus thoob plaws ntiajteb. Qhia tibneeg txog Vajtswv Txojlus thiab muab lawv ua kevcai raus dej.’