Kalpasan a nabautisaran ni Jesus, inrugina nga inkasaba: ‘Asidegen ti Pagarian ti Dios.’ Simmurot kenkuana dagiti adalanna a napan idiay Galilea ken Judea. Idi nagsubli ni Jesus iti dimmakkelanna nga ili a Nazaret, napan iti sinagoga, inukradna ti lukot ni Isaias, ket imbasana iti napigsa: ‘Inikkannak ni Jehova iti nasantuan nga espiritu tapno maikasabak ti naimbag a damag.’ Ania ti kayat a sawen dayta? Uray no kayat dagiti tattao a makita nga agaramid ni Jesus kadagiti milagro, ti kangrunaan a rason nga immawat iti nasantuan nga espiritu ket tapno ikasabana ti naimbag a damag. Idi kuan, imbagana: ‘Daytoy a padto ket natungpalen.’

Kalpasanna, napan ni Jesus iti Baybay ti Galilea ket nakitana ti uppat nga adalanna a mangngalap—da Pedro, Andres, Santiago, ken Juan. Imbagana kadakuada: ‘Surotendak, ket pagbalinenkayto a mangngalap iti tattao.’ Dagus a pinanawanda ti negosioda a panagkalap ket simmurotda kenkuana. Inkaskasabada ti maipapan iti Pagarian ni Jehova iti intero a Galilea. Nangasabada kadagiti sinagoga, paglakuan, ken kalsada. Sinursurot ida ti adu a tattao sadinoman ti napananda. Nagwaras ti damag maipapan ken Jesus agingga idiay Siria.

Idi agangay, inikkan ni Jesus ti dadduma a pasurotna iti pannakabalin a mangpaimbag kadagiti tattao ken mangparuar kadagiti demonio. Dadduma ti simmurot kenkuana a nangaskasaba kadagiti siudad ken purpurok. Nagserbi ken Jesus ken kadagiti pasurotna dagiti matalek a babbai a kas kada Maria Magdalena, Juana, ken Susana.

Kalpasan a sinanay ni Jesus dagiti adalanna, imbaonna ida a mangasaba. Idi nangasabada idiay Galilea, adu ti nagbalin nga adalan ken nabautisaran. Nakaad-adu ti mayat nga agbalin nga adalan nga uray la imbaga ni Jesus a kaslada talon a mabalinen nga anien. Kinunana: ‘Ikararagyo ken Jehova a mangibaon iti ad-adu pay nga agani.’ Idi agangay, nangpili iti 70 nga adalan ket imbaonna ida a  sagdudua a mapan mangasaba idiay Judea. Insuroda iti amin a tao ti maipapan iti Pagarian. Idi nagsublida, maragragsakanda a nangyestoria ken Jesus iti napasamak. Saan a mapasardeng ti Diablo ti trabaho a panangasaba.

Sinigurado ni Jesus nga ituloy dagiti adalanna daytoy napateg a trabaho kalpasan ti panagsublina idiay langit. Imbagana kadakuada: ‘Ikasabayo ti naimbag a damag iti intero a daga. Isuroyo kadagiti tattao ti maipapan iti Sao ti Dios, ken bautisaranyo ida.’