Nọ Jesu ọ nwane họ-ame no, o te mu usiuwoma họ ẹta inọ: ‘Uvie Ọghẹnẹ o kẹle no.’ Ahwo a je lele Jesu nọ o je no oria ruọ oria evaọ Galili gbe Judia. Nọ Jesu o zihe kpohọ ẹwho nọ ọ jẹ rria nọ a re se Nazarẹt, o te kpobọ uwou-egagọ ẹwho na, tọlọ uko-obe Aizaya, je sei dovia inọ: ‘Jihova ọ kẹ omẹ ẹzi ọfuafo riẹ no re mẹ ta usiuwoma na.’ Eme họ otofa ẹme Jesu na? Jesu ọ gwọlọ nọ ahwo a riẹ nọ Jihova ọ kẹ riẹ ẹzi ọfuafo no re ọ ta usiuwoma na, dede nọ ahwo a gwọlọ nọ o ru iruo igbunu. Ọ tẹ ta kẹ ahwo nọ a jẹ gaviezọ kẹe inọ: ‘Nẹnẹ na eruẹaruẹ na i rugba.’

Nọ oyena o vrẹ no, Jesu o te kpobọ Abade Galili. Ọ tẹ jọ etẹe ruẹ imane nọ i zihe ruọ ilele riẹ, yọ imiyei a je kpe. Ọ tẹ ta kẹ ai nọ: ‘Wha lele omẹ, me ti ru owhai họ ikwori ahwo.’ Edẹ rai họ Pita, Andru, Jemis, gbe Jọn. A tẹ nwane nyasiọ iyei nọ a je kpe na ba, a te lele iei. A tẹ jẹ ta usiuwoma kpahe Uvie Ọghẹnẹ evaọ Galili soso. Jesu avọ ilele riẹ a ta usiuwoma evaọ iwou-egagọ, evaọ eki, gbe evaọ iyẹrẹ. Ahwo buobu a je su lele ai evaọ oria kpobi nọ a jẹ nya. Usi Jesu u te do ruọ oria kpobi, makọ rite ẹwho nọ a re se Siria nọ o thabọ gaga.

Nọ omoke jọ o vrẹ no, Jesu ọ tẹ kẹ ilele riẹ jọ ogaga nọ a sai ro siwi ahwo, je le idhivẹri no ahwo oma. Amọfa jọ a je lele Jesu nọ ọ jẹ ta usiuwoma no ẹwho ruọ ẹwho. Yọ eyae jọ nọ i fi ẹrọwọ họ Jesu a jọ usu rai nọ a je fiobọhọ kẹe avọ ilele riẹ. Edẹ eyae nana jọ họ, Meri Magdalini, Joana, gbe Suzana.

Nọ Jesu o wuhrẹ ilele riẹ epanọ a rẹ ta usiuwoma no, o te vi ai nyae ta usiuwoma. Nọ a be ta usiuwoma evaọ Galili soso na, ahwo buobu a te zihe ruọ ilele Jesu jẹ họ-ame. Fikinọ ahwo buobu a gwọlọ zihe ruọ ilele Jesu, Jesu o te dhesẹ ae wọhọ udhu nọ ekakọ riẹ i te evu no. Ọ ta nọ: ‘Wha lẹ re Jihova o vi iruiruo efa ze ti vu ekakọ na.’ Nọ oke jọ o vrẹ no, ọ tẹ salọ ilele udhosa gbe ikpe (70), o te vi ai imimava nyae ta usiuwoma evaọ  Judia soso. Ilele na a je wuhrẹ oghẹrẹ ahwo kpobi kpahe Uvie Ọghẹnẹ. Nọ ilele na a zihe ze eva e jẹ were ae gaga, a tẹ vuẹ Jesu eware kpobi nọ e via. Oware ovo nọ Ẹdhọ ọ rẹ sai ru nọ o rẹ whaha iruo usiuwoma ota na o rrọ họ.

Jesu o ru eware sa-sa re ilele riẹ a ruabọhọ iruo usiuwoma ota na nọ o te kpobọ odhiwu no. Ọ tẹ ta kẹ ae nọ: ‘Wha ta usiuwoma na evaọ akpọ na soso. Wha wuhrẹ ahwo Ẹme Ọghẹnẹ jẹ họ ae ame.’