Ĩvinda ĩkuvĩ mũno ĩtina wa Yesũ kũvatiswa, nĩwambĩĩie kũtavanyʼa ayasya: ‘Ũsumbĩ wa Ngai nĩ mũthengeeu.’ Amanyĩwʼa make nĩmaendanasya nake mavinda ala waendaa Kalilii na Yutia. Na ĩndĩ yĩla wasyokie ndũanĩ ĩla waeewe ya Nasaleti, nĩwaendie ĩsinakokenĩ na oosa ĩvuku ya kũkũnzwa ya Isaia, na ĩndĩ avingũa asoma na wasya mũnene vala vaandĩkĩtwe: ‘Yeova nũnengete veva mũtheu nĩ kana nĩtavanyʼe ũvoo mũseo.’ Ndeto isu wasomie syoonanasya ata? Syoonanasya kana o na kau andũ nĩmendaa kwona Yesũ ayĩka syama, kĩtumi kĩnene kĩla kyatumie anengwa veva mũtheu nĩ kũtavanyʼa ũvoo mũseo. Amina kũsoma, eeie andũ ala mamwĩthukĩĩsye atĩĩ: ‘Ũmũnthĩ wathani ũsu nĩweanĩa.’

Yĩla Yesũ waumie Nasaleti aendie kĩsionĩ kyaĩ ũtee wa Ũkanga wa Kalilii, na vau nĩvo weethĩie aũme ana maĩ atei ma makũyũ, ala ĩtina mesie kũtwʼĩka amanyĩwʼa make. Yesũ eeie aũme asu atĩĩ: ‘Ngatĩĩai, na ngamũtwʼĩkĩthya atei ma andũ.’ Aũme asu maĩ Vetelo, Endelea, Yakovo, na Yoana. Yĩla Yesũ wameie mamũatĩĩe, nĩmatiie wĩa woo wa kũtea makũyũ na matwʼĩka amanyĩwʼa make. Nĩmaendanasya na Yesũ yĩla watavanasya ũvoo mũseo wa Ũsumbĩ wa Yeova kĩsionĩ kya Kalilii. O na ĩngĩ nĩmatavanasya masinakokenĩ, sokonĩ, na tũsĩlanĩ twa ndũa. Andũ aingĩ nĩmamaatĩĩaa vandũ vonthe vala maendaa. Ũvoo ĩũlũ wa Yesũ nĩwanyaĩĩkie kĩla vandũ, o na nĩwavikie kĩsionĩ kĩ vaasa kya Silia.

Ĩtina wa ĩvinda, Yesũ nĩwanengie aatĩĩi amwe make ũtonyi wa kũvosya andũ na kumya ndaimoni. Angĩ nĩmaendanasya nake yĩla watavanasya kuma ndũa ĩmwe kũthi ĩla ĩngĩ na kuma kĩsio kĩmwe kũthi kĩla kĩngĩ. O na ve aka kauta maĩ na mũĩkĩĩo ala matetheeasya Yesũ na aatĩĩi make. Aka asu maĩ Meli Makatalene, Yoena, Susana na angĩ aingĩ.

Ĩtina wa Yesũ kũmanyĩsya amanyĩwʼa make, nĩwamatũmie mathi makatavanyʼe. Amanyĩwʼa asu nĩmatavanisye ndũanĩ ya Kalilii yonthe, na ũu watuma andũ aingĩ matwʼĩka amanyĩwʼa na mavatiswa. Ũu woonanisye kana aingĩ nĩmendaa kũtwʼĩka amanyĩwʼa, na Yesũ amaelekanyʼa na mũũnda waĩlĩte kũkethwa. Kwondũ wa ũu, Yesũ eeie amanyĩwʼa make atĩĩ: ‘Voyai Yeova atũme athũkũmi aingĩ matetheesye  wĩa wa kũketha mĩũnda.’ Ĩtina nĩwanyuvie andũ 70 katĩ wa amanyĩwʼa make na amatũma ikundi sya amanyĩwʼa elĩ elĩ mathi makatavanyʼe Yutia yonthe. Nĩmatavisye andũ ma mĩthemba yonthe ũvoo wa Ũsumbĩ. Yĩla amanyĩwʼa masyokie, nĩmendaa mũno kũmũtavya Yesũ kĩla meeyoneie. Kwa wʼo, vayaĩ kĩndũ Ndevili waĩ atonya kwĩka akasiĩĩa wĩa wa kũtavanyʼa.

Yesũ atanamba kwambata ĩtunĩ nĩwaĩkĩĩthisye kana amanyĩwʼa makaendeea kũtethya wĩa ũsu wa mwanya amina kũthi. Ameie atĩĩ: ‘Tavanyʼai ũvoo mũseo nthĩ yonthe. Manyĩsyai andũ maũndũ ala me Ndetonĩ ya Ngai, na mũimavatisa.’