Moko najt ta xsubʼal ribʼ saʼ haʼ li Jesus naq kiʼok xpuktesinkil aʼin: «Li Xnimajwal Awabʼejilal li Yos yook chaq chi nachʼok». Ebʼ li xtzolom nekeʼxik chirix saʼ xteepal Galilea ut Judea. Naq li Jesus kisutqʼiik Nazaret, li xtenamit, xkoho saʼ li chʼutlebʼaal, kixte xbʼotbʼilhu laj Isaias ut kixyaabʼasi chi kaw: «Li Jehobʼa kixkʼe we li santil musiqʼej re naq tinpuktesi li xchaabʼil esil». Kʼaru kiraj xyeebʼal? Ebʼ li poyanam keʼraj raj rilbʼal li xsachbʼachʼoolej li Jesus. Abʼan li Jesus inkʼaʼ kixkʼul li santil musiqʼej yal re xbʼaanunkil aʼin. Li wank tzʼaqal xwankil naq tixpuktesi li chaabʼil esil chirix li Xʼawabʼejilal li Yos. Saʼ raqik, kixye rehebʼ li yookebʼ chi rabʼinkil: «Anaqwan yook chi tzʼaqlok ru li propesiiy aʼin».

Moqon, li Jesus xkoho saʼ li palaw re Galilea. Aran kiril kaahibʼ li winq ebʼ aj kar li teʼoq choʼq xtzolom ut kixye rehebʼ: «Kimqex wikʼin ut laaʼin tinbʼaanu naq ebʼ li poyanam chik teesikʼ choʼq ruuchilebʼ li kar». Li xkʼabʼaʼebʼ li winq aʼin aj Pedro, aj Andres, aj Santiago ut aj Juan. Saʼ junpaat keʼxkanabʼ li xkʼanjel chirix li karibʼk ut keʼxtaqe. Xkohebʼ chi xpuktesinkil li Xʼawabʼejilal li Jehobʼa saʼ chixjunil Galilea. Nekeʼpuktesink saʼebʼ li chʼutlebʼaal, saʼebʼ li kʼayil ut saʼatqebʼ li bʼe. Naabʼalebʼ nekeʼtaqenk rehebʼ ut maakʼaʼ naxye bʼar nekeʼxik. Kiwulak resil li Jesus yalaq bʼar, joʼ ajwiʼ saʼ li najtil tenamit Siria.

Chirix chik aʼan, li Jesus kixkʼe xwankil wiibʼ oxibʼ rehebʼ li xtzolom re xkʼirtasinkil ebʼ li yaj ut risinkil ebʼ li maaʼus aj musiqʼej. Wankebʼ nekeʼochbʼenink re chi puktesink saʼ jalan jalanq chi tenamit ut saʼ jalan jalanq chi kʼalebʼaal. Nekeʼxik ajwiʼ jun chʼuut chi ixq li nekeʼchʼolanink re li Jesus ut ebʼ li xtzolom. Saʼ xyanqebʼ li ixq aʼin wank chaq xMaria Magdalena, xJuana, xSusana ut jalanebʼ chik.

Naq ak kixkawresihebʼ li xtzolom, li Jesus kixtaqlahebʼ chi puktesink. Naq yookebʼ chi xik saʼ xteepal Galilea, naabʼalebʼ chik keʼok ajwiʼ choʼq xtzolom ut keʼxsubʼ ribʼ saʼ haʼ. Naabʼalebʼ li poyanam nekeʼraj xtaqenkil li Jesus, joʼkan naq kixjuntaqʼeetahebʼ rikʼin jun li naʼaj re qʼolok. Li Jesus kixye: «Tijonqex chiru li Jehobʼa re naq tixtaqla chaq ebʼ laj  kʼanjel re xxokbʼal li qʼolom». Moqon chik, kixsikʼ 70 rehebʼ li xtzolom ut kixtaqlahebʼ saʼ kaʼkabʼil chi puktesink saʼ chixjunil Judea. Nekeʼaatinak rikʼin chixjunilebʼ chirix li Xnimajwal Awabʼejilal li Yos. Naq keʼsutqʼiik chaq, keʼraj xseeraqʼinkil re li Jesus chanru kiʼelk li kʼanjel. Maakʼaʼ naru xbʼaanunkil laj Tza re xrambʼal li puktesink.

Li Jesus kixkʼubʼ chixjunil re naq ebʼ li xtzolom yooqebʼ xbʼaanunkil li nimla kʼanjel aʼin naq tsutqʼiiq saʼ choxa. Kixye rehebʼ: «Puktesihomaq li chaabʼil esil chirix li Xʼawabʼejilal li Yos saʼ chixjunil li Ruuchichʼochʼ. Kʼutumaq li Raatin li Yos rehebʼ li poyanam ut teesubʼebʼ saʼ haʼ».