Ihinda inini thutha wa Jesu kũbatithio, aambĩrĩirie kũhunjia ũũ: ‘Ũthamaki wa Ngai nĩ ũkuhĩrĩirie.’ Arutwo ake nĩ maamũrũmagĩrĩra rĩrĩa aathiaga Galili na Judea. Rĩrĩa Jesu aacokire kwao Nazarethi, nĩ aathiire thunagogi-inĩ, akĩhingũra gĩkũnjo kĩa Isaia, na agĩthoma ũũ anĩrĩire: ‘Jehova nĩ ahete roho mũtheru nĩguo hunjie ũhoro ũrĩa mwega.’ Ciugo icio ciendaga kuonania atĩa? Ciendaga kuonania atĩ o na gũtuĩka andũ nĩ meendaga kuona Jesu akĩringa ciama, gĩtũmi kĩrĩa kĩnene gĩatũmĩte aheo roho mũtheru kĩarĩ kũhunjia ũhoro ũrĩa mwega. Aacokire akĩra athikĩrĩria ake ũũ: ‘Ũrathi ũcio nĩ wahinga ũmũthĩ.’

Thutha ũcio, Jesu nĩ aathiire Iria-inĩ rĩa Galili harĩa aacemanirie na ategi ana a thamaki arĩa maacokire gũtuĩka arutwo ake. Aamerire ũũ: ‘Nũmĩrĩrai na nĩ ngũmũtua ategi a andũ.’ Maarĩ Petero, Andrea, Jakubu, na Johana. Maatigire biacara yao ya gũtega thamaki o hĩndĩ ĩyo na makĩmũrũmĩrĩra. Maathiire Galili guothe makĩhunjagia ũhoro wĩgiĩ Ũthamaki wa Jehova. Maahunjagia thunagogi-inĩ, thoko-inĩ, na barabara-inĩ. Kĩrĩndĩ kĩnene nĩ kĩamarũmagĩrĩra kũrĩa guothe maathiaga. Ũhoro wa Jesu waatheremire kũndũ guothe nginya Suriata.

Thutha wa ihinda, Jesu nĩ aaheire arũmĩrĩri amwe ake hinya wa kũhonania na wa kũingata ndaimono. Angĩ nao nĩ maathiaga hamwe nake akĩhunjia taũni-inĩ na matũũra-inĩ. Atumia maigana ũna ehokeku ta Mariamu Mũmagidali, Joana, Susana, na angĩ, nĩ maarũmbũyagia Jesu na arũmĩrĩri ake.

Jesu aarĩkia kũmenyeria arutwo ake, nĩ aamatũmire mathiĩ makahunjie. O ũrĩa maahunjagia Galili, noguo andũ angĩ aingĩ maatuĩkire arutwo na makĩbatithio. Kwarĩ na andũ aingĩ mũno meendaga gũtuĩka arutwo nginya Jesu akĩmaringithania na mũgũnda warĩ mũkinyu kũgethwo. Oigire ũũ: ‘Hoyai Jehova atũme aruti angĩ a wĩra nĩguo magethe.’ Aacokire agĩthuura  arutwo 70 na akĩmatũma erĩ erĩ nĩguo makahunjie Judea guothe. Maarutire andũ a mĩthemba yothe ũhoro wa Ũthamaki. Rĩrĩa arutwo acio maacokire, nĩ meeriragĩria kwĩra Jesu maũndũ marĩa meeyoneire. Gũtirĩ ũndũ o na ũmwe Mũcukani angĩekire nĩguo arũgamie wĩra wa kũhunjia.

Jesu nĩ aatigĩrĩire atĩ arutwo ake nĩ mangĩathiire na mbere kũruta wĩra ũcio wa bata o na acoka igũrũ. Aamerire ũũ: ‘Hunjiai ũhoro ũrĩa mwega thĩinĩ wa thĩ yothe. Rutai andũ Kiugo kĩa Ngai, na mũmabatithie.’