មេរៀនទី៧៨
លោកយេស៊ូផ្សព្វផ្សាយអំពីរាជាណាចក្រព្រះ
មិនយូរក្រោយពីលោកយេស៊ូទទួលការជ្រមុជទឹក លោកចាប់ផ្ដើមផ្សព្វផ្សាយថា៖ «រាជាណាចក្ររបស់ព្រះគឺជិតដល់ហើយ»។ ពួកអ្នកកាន់តាមបានទៅជាមួយលោកយេស៊ូ ជុំវិញស្រុកកាលីឡេនិងតំបន់យូឌា។ ពេលលោកយេស៊ូត្រឡប់មកក្រុងណាសារ៉ែតជាស្រុកកំណើតវិញ លោកបានចូលក្នុងសាលាប្រជុំ ហើយបើករមូរអេសាយអានឮៗថា៖ ‹ព្រះយេហូវ៉ាបានផ្ដល់ឫទ្ធានុភាពបរិសុទ្ធដល់ខ្ញុំ ដើម្បីឲ្យខ្ញុំផ្សព្វផ្សាយដំណឹងល្អ›។ តើនេះមានន័យយ៉ាងណា? នេះមានន័យថា ទោះជាបណ្ដាជនចង់ឃើញលោកយេស៊ូធ្វើការអស្ចារ្យក៏ដោយ មូលហេតុចម្បងដែលលោកបានទទួលឫទ្ធានុភាពបរិសុទ្ធ គឺដើម្បីផ្សព្វផ្សាយដំណឹងល្អ។ រួចមក លោកប្រាប់ពួកអ្នកស្ដាប់ថា៖ ‹ថ្ងៃនេះ ទំនាយនេះបានក្លាយជាការពិត›។
បន្ទាប់មក លោកយេស៊ូចេញទៅសមុទ្រកាលីឡេ។ នៅទីនោះ លោកបានជួបអ្នកកាន់តាមបួននាក់ ដែលជាអ្នកនេសាទ។ លោកបានអញ្ជើញពួកគេថា៖ ‹ចូរមកតាមខ្ញុំ។ ខ្ញុំនឹងធ្វើឲ្យអ្នក ទៅជាអ្នកនេសាទមនុស្សវិញ›។ ពួកគេគឺ ពេត្រុស អនទ្រេ យ៉ាកុប និងយ៉ូហាន។ ពួកគេបានបោះបង់ការនេសាទភ្លាមៗ ហើយទៅតាមលោកយេស៊ូ។ រួចមក ពួកគាត់បានប្រកាសអំពីរាជាណាចក្ររបស់ព្រះយេហូវ៉ាពេញស្រុកកាលីឡេទាំងមូល។ ពួកគាត់ផ្សព្វផ្សាយក្នុងសាលាប្រជុំ តាមផ្សារ និងតាមផ្លូវ។ មនុស្សជាច្រើនដើរតាមពួកគាត់គ្រប់កន្លែង។ ដំណឹងអំពីលោកយេស៊ូបានឮសុសសាយ រហូតទៅដល់ស្រុកស៊ីរី។
ក្រោយមក លោកយេស៊ូបានឲ្យអ្នកកាន់តាមខ្លះមានអំណាចជួយមនុស្សឈឺឲ្យជាសះស្បើយ និងបណ្ដេញវិញ្ញាណកំណាច។ រីឯអ្នកកាន់តាមខ្លះទៀត ពួកគេបានទៅផ្សព្វផ្សាយជាមួយលោកយេស៊ូ ពីក្រុងមួយទៅក្រុងមួយ និងពីភូមិមួយទៅភូមិមួយ។ ស្ត្រីស្មោះត្រង់មួយចំនួនរួមមាន ម៉ារៀម៉ាក់ដាឡេន យ៉ូហាណា ស៊ូសាណា និងអ្នកឯទៀតជួយមើលថែលោកយេស៊ូ និងពួកអ្នកកាន់តាមលោក។
បន្ទាប់ពីលោកយេស៊ូបង្ហាត់បង្រៀនពួកអ្នកកាន់តាម លោកបានចាត់ពួកគេឲ្យទៅផ្សព្វផ្សាយ។ ពួកគេធ្វើដំណើរទូទាំងស្រុកកាលីឡេ ដោយជួយមនុស្សជាច្រើនក្លាយជាអ្នកកាន់តាមលោក ហើយទទួលការជ្រមុជទឹក។ ពេលលោកយេស៊ូឃើញមនុស្សជាច្រើនចង់ក្លាយជាអ្នកកាន់តាមលោក លោកបានប្រដូចពួកគេទៅនឹងវាលស្រែដែលទុំល្មមច្រូត។ លោកមានប្រសាសន៍ថា៖ ‹ចូរអធិដ្ឋានសុំព្រះយេហូវ៉ាឲ្យចាត់កម្មករមកថែមទៀត ដើម្បីច្រូតប្រមូលផល›។ បន្ទាប់មក លោកជ្រើសរើសពួកអ្នកកាន់តាម៧០នាក់ ហើយចាត់ពួកគេជាគូៗឲ្យទៅផ្សព្វផ្សាយពេញតំបន់យូឌា។ ពួកគេបង្រៀនមនុស្សគ្រប់ប្រភេទអំពីរាជាណាចក្រព្រះ។ ពេលត្រឡប់មកវិញ ពួកគេប្រាប់លោកយេស៊ូយ៉ាងរំភើបចិត្តអំពីអ្វីដែលបានកើតឡើង។ គ្មានអ្វីដែលមេកំណាចអាចធ្វើ ដើម្បីបញ្ឈប់កិច្ចការផ្សព្វផ្សាយនោះទេ។
លោកយេស៊ូចង់ឲ្យពួកអ្នកកាន់តាមលោកបន្តធ្វើកិច្ចការដ៏សំខាន់នេះ ក្រោយពីលោកត្រឡប់ទៅស្ថានសួគ៌វិញ។ ដូច្នេះ លោកបានបង្គាប់ពួកគេថា៖ ‹ចូរផ្សព្វផ្សាយដំណឹងល្អទូទាំងផែនដី។ ចូរបង្រៀនមនុស្សអំពីបណ្ដាំរបស់ព្រះ ហើយជ្រមុជទឹកឲ្យពួកគេ›។
«ខ្ញុំក៏ត្រូវប្រកាសដំណឹងល្អអំពីរាជាណាចក្ររបស់ព្រះនៅក្រុងផ្សេងទៀតដែរ ពីព្រោះនេះជាមូលហេតុដែលខ្ញុំបានត្រូវចាត់ឲ្យមក»។—លូកា ៤:៤៣
លោកអ្នកក៏ប្រហែលជាចូលចិត្តដែរ
លោកយេស៊ូ ជាផ្លូវ ជាសេចក្ដីពិត ជាជីវិត
លោកយេស៊ូចាត់អ្នកកាន់តាម៧០នាក់ឲ្យទៅផ្សព្វផ្សាយ
ក្នុងតំបន់យូឌា លោកយេស៊ូបានចាត់អ្នកកាន់តាម៧០នាក់ដែលជាអ្នកផ្សព្វផ្សាយរាជាណាចក្រឲ្យផ្សាយជាគូៗ។ តើអ្នកកាន់តាមលោកទៅផ្សព្វផ្សាយនៅកន្លែងណា? តើនៅសាលាប្រជុំ ឬនៅផ្ទះរបស់បណ្ដាជន?
លោកយេស៊ូ ជាផ្លូវ ជាសេចក្ដីពិត ជាជីវិត
លោកយេស៊ូចាប់ផ្ដើមមានអ្នកកាន់តាម
តើអ្វីបានធ្វើឲ្យអ្នកកាន់តាម៦នាក់ដំបូងរបស់លោកយេស៊ូជឿជាក់ថាពួកគេបានរកឃើញមេស្ស៊ី?
សូមស្តាប់គ្រូដ៏ល្អប្រសើរ
ពួកអ្នកដែលបានទៅជាអ្នកកាន់តាមលោកយេស៊ូ
តើពួកគាត់ជាមនុស្សបែបណា?
សំណួរនិងចម្លើយពីគម្ពីរ
តើរាជាណាចក្ររបស់ព្រះជាអ្វី?
សូមស្វែងយល់នូវមូលហេតុដែលរាជាណាចក្ររបស់ព្រះប្រសើរជាងរដ្ឋាភិបាលទាំងអស់របស់មនុស្ស។
