Buthuku buke Yesu alibatizibirwe, mwatsukiraho erithulira athi: ‘Obwami bwa Nyamuhanga buli hakuhi.’ Abigha biwe mubamukwama akathimba omo Galilaya ne Yudea. Omughulhu Yesu asuba omwa tawuni ey’ewabu e Nazareti, mwaghenda omwa sinagogi, mwasoma omukunzo w’ekitabu kya Isaya omwa mulenge muuli athi: ‘Yehova abirinyiha omulimu abuyirire nuku ngathulhughanaye engulhu yuwene.’ Ekyo kyamanyisayaki? Kyamanyisaya kithi nomwakine indi abandu babya banzire ibalhangira Yesu akakolha ebithiko-thiko, enzumwa ngulhu eyaleka iniahebwa omulimu abuyirire lyabya iry’erithulhughania engulhu yuwene. Neryo mwabwira abahulikiriri biwe athi: ‘Munabwire obuminyereri obu bwamabererera.’

Enyuma waho, Yesu mwaghenda okwa Ngetse ye Galilaya, eyo abana abasohi bbani ababya abigha biwe enyuma waho. Mwabakokya athi: ‘Munyikwame, ngendibayira mwa basohi ba bandu.’ Abo babya Petero, Anderea, Yakobo, na Yoane. Aho n’aho mubasighania emibiiri yabu y’obusohi bamamukwama. Mubathimba omwa Galilaya yosi bakathulhughania Obwami bwa Yehova. Mubathulira omwa sinagogi, omwa hithali, n’okwa syonzira. Abandu bangyi ibakabakwama ehosi-hosi eyo bakaya. Omwatsi owahambire oku Yesu mwahika ehosi-hosi, nibya ne Suria.

Endambi muyahika Yesu amaha abandi bigha biwe b’obuthoki bw’erilhamya abandu n’erihigha esyombinga. Abandi mubaghenda nayu akathulira omwa miyi n’omwa byalu. Abakali abathaleghulha imwamuli Maria Magdalene, Yoana, Susana, n’abandi mubaghetha-ghetha Yesu n’abigha biwe.

Yesu abere abirithendeka abigha biwe, mwabathuma athi bayathulire. Babere bane muthimba omwa Galilaya yosi, abandi bandu bangyi mubabya bigha ba Yesu kandi mubabatizibwa. Neryo abanene mubanza eribya bigha kyamaleka Yesu iniabalinganisya ng’eririma eriri mw’eby’erire eby’erigheswa. Yesu mwabugha athi: ‘Musabe Yehova athume abandi bahingyi okw’ighesa.’ Enyuma waho, mwasombolha abandi bigha 70, amabathuma mwa babiri-babiri eriyathulira omwa  Yudea. Mubakangirirya abandu b’emisindo yosi oko Bwami. Abigha babere bakasubulha, mubanza eribwira Yesu ebyosi ebyabere. Sitani abya isyawithe eky’angakolha erikakirya omubiiri w’erithulira.

Yesu mwalhangira athi abigha biwe bakendi lholha embere erikolha omubiiri mukulhu oyu abirisuba elhubulha. Yesu mwababwira athi: ‘Muthulire engulhu yuwene omwa kihugho kyosi. Mukangiriraye abandu okwa Kinywe kya Nyamuhanga, n’eribatizyabo.’