Jɔs afta we Jizɔs baptayz, i bigin fɔ prich se: ‘Gɔd in Kiŋdɔm dɔn kam nia.’ In disaypul dɛn bin de fala am we i de go na Galili ɛn Judia. We Jizɔs go bak na in om-tɔŋ na Nazarɛt, i go na di sinagɔg, i opin Ayzaya in skrol, ɛn rid am lawd wan se: ‘Jiova dɔn gi mi in oli spirit so dat a go prich di gud nyuz.’ Wetin dat min? I min se pan ɔl we pipul dɛn bin want fɔ si Jizɔs de pafɔm mirekul dɛn, di men rizin we mek i bin gɛt oli spirit na fɔ prich di gud nyuz. Dɔn i tɛl di wan dɛn we de lisin to am se: ‘Tide dis prɔfɛsi dɔn kam tru.’

Afta dat, Jizɔs go na di Si na Galili. Na de i mit 4 pan in disaypul dɛn we na bin fishaman dɛn. I invayt dɛn bay we i tɛl dɛn se: ‘Una fala mi, ɛn a go sho una aw fɔ luk fɔ pipul dɛn jɔs lɛk aw una kin luk fɔ fish.’ Jizɔs invayt Pita, Andru, Jems, ɛn Jɔn. Wantɛm wantɛm, dɛn lɛf dɛn fishin wok ɛn fala am. Dɛn go ɔlsay na Galili de prich bɔt Gɔd in Kiŋdɔm. Dɛn bin de prich na di sinagɔg dɛn, na makit dɛn, ɛn na strit dɛn. Bɔku bɔku pipul dɛn bin de fala dɛn ɛnisay we dɛn go. Ɔlman bin kam fɔ no bɔt Jizɔs ɔlsay, te go na Siria.

As tɛm de go, Jizɔs gi in disaypul dɛn di pawa fɔ mɛn difrɛn difrɛn sik dɛn ɛn fɔ mɛn di wan dɛn we gɛt dimɔn. Ɔda wan dɛn bin go wit am fɔ go prich frɔm siti to siti ɛn frɔm vilej to vilej. Ɛn bɔku fetful uman dɛn, lɛk Meri Magdalin, Joana, Suzana, ɛn ɔda wan dɛn bin kia fɔ Jizɔs ɛn in disaypul dɛn.

Afta we Jizɔs bin dɔn tren in disaypul dɛn, i sɛn dɛn fɔ go prich. As dɛn bin de prich ɔlsay na Galili, bɔku ɔda pipul dɛn bi disaypul dɛn ɛn dɛn baptayz. Bɔku pipul dɛn bin want fɔ bi Jizɔs in disaypul dɛn, so i kɔmpia dɛn to fam we dɔn rɛdi fɔ avɛst. I tɔk se: ‘Una pre to Jiova fɔ mek i sɛn mɔ wokman dɛn fɔ kam avɛst.’ Leta, i pik 70 pan in disaypul dɛn ɛn sɛn dɛn fɔ go prich  tu-tu ɔlsay na Judia. Dɛn tich ɔlkayn pipul dɛn bɔt Gɔd in Kiŋdɔm. We di disaypul dɛn kam bak, dɛn bin gladi fɔ tɛl Jizɔs wetin apin. Setan nɔ bin ebul fɔ du natin fɔ stɔp di prichin wok.

Jizɔs bin mek shɔ se in disaypul dɛn go kɔntinyu fɔ du dis impɔtant wok afta we i go dɔn go bak na ɛvin. I tɛl dɛn se: ‘Una prich bɔt di gud nyuz ɔlsay na di wɔl. Una tich pipul dɛn bɔt Gɔd in Wɔd ɛn una baptayz dɛn.’