တၢ်မၤလိ ၇၈
ယ့ၣ်ၡူးစံၣ်တဲၤတဲလီၤ ဘီမုၢ်တၢ်ကစီၣ်
ယ့ၣ်ၡူးဘျၢထံဝံၤ တယံာ်တမီၢ်န့ၣ် အဝဲစးထီၣ်စံၣ်တဲၤတဲလီၤဝဲလၢ– ‘ယွၤအဘီမုၢ်ဟဲဘူးထီၣ်လံ.’ ဖဲယ့ၣ်ၡူးလဲၤဝဲလၢ ကီၢ်ကၤလံၤလါဒီးကီၢ်ယူဒၤအခါ အပျဲၢ်အဘီၣ်တဖၣ်လဲၤပိာ်ဝဲအခံလီၤ. ဖဲယ့ၣ်ၡူးက့ၤတုၤဝဲလၢ အအိၣ်တၢ်လီၢ်လၢ ဝ့ၢ်နစၤရ့းအခါ အဝဲလဲၤထီၣ်ဝဲလၢဘူၣ်ဘျီၣ်ပူၤ, အိးထီၣ်ဝဲဝံယၡါယၤ အလံာ် ဒီးဖးထီၣ်ဝဲလၢအကလုၢ်ဖးဒိၣ်လၢ– ‘ဒ်သိးယစံၣ်တဲၤတဲလီၤ တၢ်သးခုကစီၣ်ကသ့အဂီၢ် ယဟိဝၤယွၤဟ့ၣ်လီၤယၤသးစီဆှံလီၤ.’ ယ့ၣ်ၡူးအဲၣ်ဒိးတဲဝဲအခီပညီဒ်လဲၣ်. ပှၤအါဂၤအဲၣ်ဒိးထံၣ် ယ့ၣ်ၡူးမၤတၢ်လီၤလး သနာ်က့ တၢ်ဂ့ၢ်အရ့ဒိၣ်ကတၢၢ်လၢ ကစၢ်ယွၤဟ့ၣ်လီၤယ့ၣ်ၡူး အသးစီဆှံန့ၣ် မ့ၢ်ဝဲဒ်သိး ယ့ၣ်ၡူးကစံၣ်တဲၤတဲလီၤတၢ်သးခုကစီၣ်အဂီၢ်လီၤ. ဝံၤဒီး ယ့ၣ်ၡူးတဲဘၣ် ပှၤလၢအဒိကနၣ်တၢ်တဖၣ်လၢ– ‘တနံၤအံၤဝံအတၢ်ကတိၤအံၤ ဟဲလၢပှဲၤထီၣ်ဝဲလံ.’
လၢခံန့ၣ် ယ့ၣ်ၡူးလဲၤဝဲလၢ ပီၣ်လဲၣ်ကၤလံၤလါလီၤ. ဖဲန့ၣ်န့ၣ် ယ့ၣ်ၡူးထံၣ်န့ၢ်ဝဲအပျဲၢ်အဘီၣ် လွံၢ်ဂၤလၢအမ့ၢ်ပှၤမၤညၣ်ဖိလီၤ. ယ့ၣ်ၡူးတဲဘၣ်အဝဲသ့ၣ်လၢ– ‘ဟဲပိာ်ယခံ, ဒီးသုကကဲထီၣ် ပှၤမၤညၣ်ပှၤကညီလီၤ.’ အဝဲသ့ၣ်န့ၣ် မ့ၢ်ဝဲစီၤပ့းတရူး, စီၤအၣ်ဒရ့း, စီၤယၤကိာ် ဒီးစီၤယိၤဟၣ်လီၤ. တဘျီဃီန့ၣ် အဝဲသ့ၣ်ပာ်တ့ၢ်ကွံာ် အတၢ်ဖံးတၢ်မၤ ဒီးပိာ်ထီၣ်ဝဲယ့ၣ်ၡူးအခံလီၤ. အဝဲသ့ၣ်စံၣ်တဲၤတဲလီၤဘၣ်ဃးဒီး ယဟိဝၤယွၤအဘီမုၢ်အဂ့ၢ်လၢ ကီၢ်ကၤလံၤလါဒီကီၢ်ညါလီၤ. အဝဲသ့ၣ်လဲၤစံၣ်တဲၤတဲလီၤတၢ်လၢ ဘူၣ်ဘျီၣ်ပူၤ, လၢပှၤဆါတၢ်ပှ့ၤတၢ်အလီၢ် ဒီးလၢကျဲပူၤန့ၣ်လီၤ. ဖဲအဝဲသ့ၣ်လဲၤတၢ်လီၢ် တပူၤလၢ်လၢ်န့ၣ်ပှၤဂီၢ်မုၢ်တဖၣ် လူၤပိာ်ထီၣ်အဝဲသ့ၣ်အခံလီၤ. ယ့ၣ်ၡူးအတၢ်ကစီၣ်န့ၣ် ရၤလီၤအသးလၢတၢ်လီၢ်ကိးပူၤဒဲး တုၤလီၤလၢကီၢ်စူၤရံလီၤ.
လၢခံန့ၣ် ယ့ၣ်ၡူးဟ့ၣ်လီၤဝဲတၢ်စိကမီၤလၢ အပျဲၢ်အဘီၣ်တနီၤအအိၣ် ဒ်သိးအဝဲသ့ၣ်မၤဘျါပှၤဂၤ အတၢ်ဆါ ဒီးဟီထီၣ်ကွံာ်တၢ်နါကသ့အဂီၢ်လီၤ. ဖဲယ့ၣ်ၡူးစံၣ်တဲၤတဲလီၤတၢ်လၢ ဝ့ၢ်တဝ့ၢ်ဘၣ်တဝ့ၢ်ဒီး လၢသဝီတဖျၢၣ်ဘၣ်တဖျၢၣ်အခါ ပှၤအဂၤတဖၣ် လဲၤတၢ်ဒီးအီၤလီၤ. ပှၤပိာ်မုၣ် ဒ်သိးဒီး နီၢ်မၤရံမၤကဒၤလ့ၣ်, နီၢ်ယိၤအၣ်နၣ်, နီၢ်စူၤစၣ်နၤ ဒီးပိာ်မုၣ်လၢအသးတီအဂၤတဖၣ်န့ၣ် ကွၢ်ထွဲဝဲ ယ့ၣ်ၡူးဒီး အပျဲၢ်အဘီၣ်တဖၣ်လီၤ.
ဖဲယ့ၣ်ၡူးသိၣ်လိသီလိ အပျဲၢ်အဘီၣ်တဖၣ်ဝံၤအလီၢ်ခံ အဝဲဆှၢလီၤအပျဲၢ်အဘီၣ်လၢ ကလဲၤစံၣ်တဲၤတဲလီၤတၢ်လီၤ. ဖဲအဝဲသ့ၣ် လဲၤစံၣ်တဲၤတဲလီၤတၢ်လၢ ကီၢ်ကၤလံၤလါအခါ ပှၤအါဂၤကဲထီၣ်ယ့ၣ်ၡူးအပျဲၢ်အဘီၣ် ဒီးဒိးဘျၢအသးလၢထံလီၤ. ပှၤအါဂၤအဲၣ်ဒိးကဲထီၣ်ဝဲ ယ့ၣ်ၡူးအပျဲၢ်အဘီၣ်အဃိ ယ့ၣ်ၡူးထိၣ်သတြီၤအဝဲသ့ၣ်ဒ် ဘုလၢအဘီထီၣ်လၢ ပှၤကဘၣ်ကူးအီၤအဂီၢ်လီၤ. ယ့ၣ်ၡူးတဲဝဲလၢ– ‘ဃ့ဘါထုကဖၣ်လၢ ယဟိဝၤယွၤအအိၣ်ဒ်သိး ကဆှၢလီၤအါထီၣ်ဝဲ ပှၤကူးဘုဖိအဂီၢ်တက့ၢ်.’ လၢခံ ယ့ၣ်ၡူးဃုထၢအါထီၣ်ဝဲ အပျဲၢ်အဘီၣ်အဂၤ ၇၀ ဒီးဆှၢလီၤအဝဲသ့ၣ် ခံဂၤတပူၤခံဂၤတပူၤလၢ
ကစံၣ်တဲၤတဲလီၤတၢ်လၢ ကီၢ်ယူဒၤဒီဘ့ၣ်ညါလီၤ. အဝဲသ့ၣ်သိၣ်လိပှၤအါဂၤလၢ ဘၣ်ဃးဒီးဘီမုၢ်အဂ့ၢ်လီၤ. ဖဲယ့ၣ်ၡူးအပျဲၢ်အဘီၣ်တဖၣ်ဟဲက့ၤအခါ လၢတၢ်သူၣ်ဆူၣ်သးဆူၣ်အပူၤ အဝဲသ့ၣ်တဲဘၣ်ဝဲယ့ၣ်ၡူးလၢ တၢ်မၤအသးသ့ၣ်တဖၣ်န့ၣ်လီၤ. မုၣ်ကီၤလံၢ်မၤပတုာ်ဝဲ တၢ်စံၣ်တဲၤတဲလီၤအတၢ်မၤတန့ၢ်ဘၣ်.ယ့ၣ်ၡူးသိၣ်လိနဲၣ်လိအပျဲၢ်အဘီၣ်တဖၣ် လီၤတံၢ်လီၤဆဲးဒ်သိး အဝဲသ့ၣ် ကဆဲးမၤဝဲတၢ်မၤလၢ အရ့ဒိၣ်အံၤ ဖဲအဝဲက့ၤထီၣ်ဝဲဆူမူခိၣ်အခါန့ၣ်လီၤ. ယ့ၣ်ၡူးတဲဘၣ်အဝဲသ့ၣ်လၢ– ‘လဲၤလၢဟီၣ်ခိၣ်ဒီဘ့ၣ် ဒီးစံၣ်တဲၤတဲလီၤတၢ်တက့ၢ်. သိၣ်လိသီလိပှၤအဂၤတဖၣ် ဘၣ်ဃးဒီး ကစၢ်ယွၤအကလုၢ်ကထါ ဒီးဘျၢအဝဲသ့ၣ်လၢထံတက့ၢ်.’
“ယဘၣ်စံၣ်တဲၤတဲလီၤယွၤအဘီအမုၢ် အတၢ်သးခုကစီၣ်လၢ ဝ့ၢ်အဂုၤအဂၤအပူၤစ့ၢ်ကီးလီၤ. အဂ့ၢ်ဒ်အံၤ, မ့ၢ်လၢတၢ်အံၤအဂ့ၢ်ဒီး, တၢ်မၢလီၤယၤလီၤ.”—လူၤကၣ် ၄:၄၃